დღეს, 5 მარტს, განათლების მინისტრმა ე.წ. ახალგაზრდული პოლიტიკის ხედვა წარმოადგინა.
მისი თქმით, პროგრამის სამიზნე აუდიტორია ძირითადად სტუდენტები იქნებიან.
გიორგი ამილახვრის თქმით, პროექტი დაახლოებით 25 ათასამდე სტუდენტს მოიცავს.
როგორც განათლების მინისტრი ამბობს, ახალგაზრდული პოლიტიკის დოკუმენტის მიზანია ახალგაზრდებში ეროვნულ-სახელმწიფოებრივი და პატრიოტული ღირებულებების გაძლიერება. ასევე ახალგაზრდების დასაქმების ხელშეწყობა.
„ხელსაყრელი გარემოს შექმნა ახალგაზრდების დასაქმებისთვის და მათი ჩართვა კულტურულ, სპორტულ და შემეცნებით აქტივობებში. ახალგაზრდები ჩაერთვებიან სპორტულ ტურნირებში, კულტურულ პროექტებში, მოხალისეობრივ კონკურსებში უნივერსიტეტებს შორის, მათ შორის თეატრალურ კონკურსებშიც.
ასევე ხელს შევუწყობთ სტემ მიმართულებით კონკურსების დაფინანსებასაც“, – ამბობს ამილახვარი.
მისი თქმით, ახალგაზრდული ფესტივალი უახლოეს დღეებში დაიწყება და სამ თვეს გაგრძელდება.
ახალგაზრდული პოლიტიკის დოკუმენტი, როგორც მინისტრმა პრეზენტაციისას თქვა, მოიაზრებს მცირე საგრანტო კონკურსებსაც. თითოეული პროექტისთვის გათვალისწინებული იქნება 15 ათასი ლარი. დაფინანსება გათვალისწინებული იქნება ახალგაზრდული ორგანიზაციებისთვის.
პროექტის მთლიანი ღირებულება ასი ათასი ლარი იქნება. თითოეული პროექტის ხანგრძლივობა უნდა იყოს მინიმუმ სამი თვე.
დაფინანსდება შემდეგი შინაარსის პროექტები:
„მშვიდობის მშენებლობა, მოხალისეობა, მეწარმეობა, აქტიური მოქალაქეობა, ეთნიკური უმცირესობების ინტეგრაცია, კულტურათაშორისო დიალოგი და სხვა“.
მინისტრმა დააანონსა სტაჟირების პროგრამაც, რომელიც სტუდენტების დასაქმებას ითვალისწინებს.
