19 ოქტომბრიდან აჭარაში საზოგადოებრივი ტრანსპორტის მოძრაობა აღდგება, მათ შორის საქალაქთაშორისოც. ამის შესახებ დღეს, 15 ოქტომბერს, განაცხადა პრემიერ-მინისტრმა გიორგი გახარიამ, მთავრობის სხდომის შემდეგ.
მისი თქმით, შეზღუდვების მოხსნა ეპიდსიტუაციის სტაბილურობას უკავშირდება.
სამაგიეროდ, როგორც გახარია ამბობს, ხვალიდან თბილისსა და ქუთაისში 22:00 საათის შემდეგ შეიზღუდება რესტორნების და ყველა გასართობი ცენტრების მუშაობ,. „ეს მოგვცემს შესაძლებლობას, რომ ვირუსის გავრცელების სისწრაფე შევანელოთ,“- ამბობს ის.
სატრანსპორტო შეზღუდვის მოხსნის მიუხედავად, აჭარაში ძალაში რჩება შეზღუდვები საგანმანათლებლო დაწესებულებებზე, სადაც სწავლა დისტანციურად მიმდინარეობს. შეზღუდვა არ ვრცელდება თბილისზე და გახარიას თქმით, ეპიდსიტუაციის გაუარესების მიუხედავად, თბილისში აუდიტორიებში მაინც განახლდება სწავლა 19 ოქტომბერს. თუმცა, სასწავლებლებს შეუძლიათ სასწავლო პროცესი დისტანციურადაც წარმართონ.
ამავე დროს, პრემიერი ამბობს, რომ ქვეყნის ეკონომიკური მდგომარეობიდან გამომდინარე უნდა მოხდეს სამუშაო ადგილების შენარჩუნება. „წესების დაცვა, პირდაბის ტარება და დისტანციის დაცვა მოგვცემს საშუალებას, სწრაფად აღვადგინოთ ეკონომიკა“.
გახარიამ ბრიფინგზე ევროპის მიმართულებით ავიარეისების რაოდენობის გაზრდაზეც ისაუბრა.
დღეს კორონავირუსის 919 ახალი შემთხვევა გამოვლინდა ქვეყანაში.
