ბათუმის სამშობიარო სახლიდან ახალშობილი გაწერეს. როგორც სამშობიარო სახლის დირექტორი ნუგზარ პაპავა ამბობს, ჩვილი კორონავირუსზე დაბადებიდან მალევე გაიტესტა და პასუხი დადებითი აღმოჩნდა. დირექტორის თქმით, რთულია იმაზე საუბარი, გადადის თუ არა ვირუსი ჩვილზე მუცლადყოფნის პერიოდში, თუმცა ტესტირებამ ამ შემთხვევაში დადებითი პასუხი აჩვენა.
„ამ ჩვილის გარდა შვიდი ბავშვი დაიბადა კიდევ, თუმცა მათ კორონავირუსი არ დაუდასტურდათ. ბავშვის დედაც იყო კოვიდინფიცირებული და მკურნალობდა კლინიკაში. კოვიდზე დადებითი პასუხი ჰქონდა კიდევ ერთ ჩვილს, რომელიც მანამდე სხვა კლინიკიდან გადმოიყვანეს. ორივე ჩვილი განიკურნა და გავწერეთ. პირველი უფრო ადრე გაიწერა,“- ამბობს ნუგზარ პაპავა.
ამჟამად ბათუმის სამშობიარო სახლში 29 ორსული მკურნალობს კორონავირუსზე და ერთ პაციენტს კიდევ ელოდებიან. „ცხელების ცენტრშია პაციენტი და იქედან აპირებენ გადმოყვანას,“ – გვითხრა სამშობიარო სახლის დირექტორმა.
მისი თქმით, სამი პაციენტის მდგომარეობა შედარებით რთულია, რადგან მათ პნევმონია აქვთ.
