Batumelebi | ბათუმში ციფრულ ჰუმანიტარიაში სეზონური სკოლა გაიხსნა ბათუმში ციფრულ ჰუმანიტარიაში სეზონური სკოლა გაიხსნა – Batumelebi
RU | GE  

ბათუმში ციფრულ ჰუმანიტარიაში სეზონური სკოლა გაიხსნა

ბათუმის შოთა რუსთაველის სახელმწიფო უნივერსიტეტში ბათუმის IX სეზონური სკოლა დიგიტალურ ჰუმანიტარიაში გაიხსნა.

სეზონური სკოლის თემაა „ციფრული რუსთველოლოგია“, ხოლო მიზანი „ვეფხისტყაოსნის“ მულტილინგვური პარალელური კორპუსის“ შექმნა. რუსთაველის პოემა ქართველების სავიზიტო ბარათია, რომელიც 55 ენაზეა ნათარგმნი, ზოგიერთ ენაზე კი – არაერთხელ.

ამგვარად, კვალიფიციური ახალგაზრდა კადრების მომზადება დიგიტალური ქართველოლოგიის უმთავრესი ამოცანაა. თეორიულ და პრაქტიკულ ნაწილს გაუძღვებიან ევროპასა და საქართველოში მოღვაწე მეცნიერები, დარგის ცნობილი ექსპერტები და ახალგაზრდა სპეციალისტები. სალექციო კურსი მიეძღვნება დიგიტალური ქართველოლოგიისა და კავკასიოლოგიის, როგორც ახალი მიმართულების განსაზღვრას და თეორიული ჩარჩოს ჩამოყალიბებას. განსაკუთრებული მნიშვნელობა მიენიჭება კვლევის თანამედროვე მეთოდების ათვისებას, დიგიტალურ ქართველოლოგიაში და კავკასიოლოგიაში მულტიდისციპლინური რესურსების შესაქმნელად საჭირო ინსტრუმენტების გაცნობა-ათვისებას (მულტიმედიური ფორმატის ფაილები EAF და FLEX, ფორმატი XML). საგანგებო ყურადღება დაეთმობა დიგიტალური ქართველოლოგიის მიღწევებისა და განვითარების პერსპექტივებს; აგრეთვე, აღნიშნული პროფილის ქართული და საერთაშორისო ელექტრონული რესურსების (ARMAZI, ECLinG, CauPal, SSGG, GeoPal, GDC, GNC, DigiArchive, Spoken BNC2014, ELDP–SOAS) სტუდენტებისათვის გაცნობას.

სეზონური სკოლა დაფინანსებულია აჭარის ავტონომიური რესპუბლიკის განათლების, კულტურისა და სპორტის სამინისტროს უმაღლესი განათლების ხელშეწყობის ქვეპროგრამის ფარგლებში.

მიმდინარე წელს პროგრამის ფარგლებში კიდევ ორი სეზონური სკოლა გაიმართება.

ნეტგაზეთის მასალების სხვა გამოცემებში გადაბეჭდვის წესი
ავტორი