მთავარი,სიახლეები

ბათუმის მე-3 საჯარო სკოლის ეზოში კიდევ ერთ შენობას ააშენებენ

07.12.2023 • 3481
ბათუმის მე-3 საჯარო სკოლის ეზოში კიდევ ერთ შენობას ააშენებენ

აჭარის განათლების სამინისტრო ბათუმის მესამე საჯარო სკოლის ტერიტორიაზე კიდევ ერთი შენობის მშენებლობას გეგმავს.

პროექტის განმარტებითი ბარათის მიხედვით, შენობა 330 მოსწავლეზე იქნება გათვლილი.

ესკიზი

ბათუმის #3 საჯარო სკოლა გორგასლის #122-ში მდებარეობს. სკოლა დამხმარე შენობებისა და ეზოს ჩათვლით 4474 კვ.მეტრს აერთიანებს.

დოკუმენტების მიხედვით, რომლებიც სამინისტრომ მშენებლობის ნებართვის მისაღებად მერიას წარუდგინა, პროექტი შპს „გამა კონსალტინგს“ მოუმზადებია.

გენგეგმა

ამ დროისთვის სკოლის მთავარი შესასვლელი ვახტანგ გორგასლის ქუჩის მხრიდან არის. ახალ შენობას კი დამოუკიდებელი შესასვლელი ექნება ფარნავაზ მეფის ქუჩის მხრიდან.

სამინისტროს განმარტებით, სამსართულიანი შენობა იქნება ადაპტირებული შშმ პირებისთვის და აშენდება სამშენებლო კოდექსით გათვალისწინებული სტანდარტების შესაბამისად.

რენდერი

საინტერესოა ისიც, რომ მერიამ შპს „გამა კონსალტინგის“ პროექტი დაიწუნა და სამინისტროს რამდენიმე ხარვეზის გასწორება და ახალი დოკუმენტების წარდგენა მოსთხოვა.

მერიამ სამინისტროს უპასუხა:

„წარმოდგენილი იქნეს არქიტექტურული ნაწილების ტექნიკური რეგლამენტის მოთხოვნებთან შესაბამისობის საექსპერტო შეფასება. წესების შესაბამისად გათვალისწინდეს სახანძრო ავტომობილების მისასვლელი/ მისადგომი გზების მოწყობა და სრულყოფილი სახით აისახოს პროექტში.

საგენერატორო სათავსო გადატანილი იქნეს ტერიტორიაზე, სკოლის შენობაში ჩაშენებული, მიშენებული და დაშენებული საგენერატორო სათავსოს მოწყობა დაუშვებელია. რაც შეეხება წარმოდგენილ ხანძარსაწინააღმდეგო დაცვის სისტემებსა და საინჟინრო პროექტებს, არ არის სრულყოფილი, არ შეიცავს სათანადო ინფორმაციას, სრულყოფილ განმარტებით ბარათებს, არ არის თანხვედრაში არქიტექტურულ პროექტთან და საჭიროებს ცვლილება-დამატებების შეტანას.

ამასთან ერთად განგიმარტავთ, რომ წარმოსადგენი საექსპერტო შეფასება თანხვედრაში უნდა მოდიოდეს არქიტექტურულ პროექტთან და ეს ყველაფერი უნდა შეესაბამებოდეს ტექნიკური რეგლამენტის მოთხოვნებს (მაგ: ლიფტის შახტაში დაწნევის სისტემის მოწყობის აუცილებლობა, საშხეფი სისტემების მოწყობის აუცილებლობა, კიბის უჯრედში დაწნევის სისტემის მოწყობის აუცილებლობა, მიწისქვეშა ტექნიკურ სართულზე კვამლგამწოვი სისტემის მოწყობის აუცილებლობა და ა.შ)“

ეს პირველი შემთხვევა არ არის, როცა სამინისტრო სკოლის გაფართოების მიზნით მოქმედი სკოლის ტერიტორიის სამშენებლოდ გამოყენებას გეგმავს.

ბათუმის №14 და №18 საჯარო სკოლების დამატებითი კორპუსებისა და სახელოვნებო სკოლის მშენებლობაზე აჭარის განათლების სამინისტრომ ტენდერი 37 944 034 ლარით გამოაცხადა, თუმცა ეს ტენდერი არ შედგა.

ამ თემაზე:

 

37,9 მილიონი ლარი ორი სკოლის ახალი კორპუსებისა და სახელოვნებო სკოლისთვის ბათუმში

 

გადაბეჭდვის წესი


ასევე: