დღეს, 15 ივლისს, ბათუმში მთავრობის სახლის წინ ორი აქცია გაიმართა ერთდროულად. ერთი აქციის მონაწილეები თურქეთში დასაქმებული ქალები იყვნენ, რომლებიც საზღვრის გახსნას ან ყოველთვიურ კომპენსაციას ითხოვენ.
მეორე აქციის ორგანიზატორი კი ე.წ. „ხოფის“ ბაზრობის ყოფილი მფლობელები, ანანიძეების ოჯახის წევრებია, რომლებიც აცხადებენ, რომ მათ 2008 წელს იძულებით დაათმობინეს ქონება და დაბრუნებას ვერ ახერხებენ. სწორედ მათ გაშალეს კარვები მთავრობის სახლის წინ და აქ დარჩენას აპირებენ მანამ, სანამ მათი მოთხოვნა არ იქნება დაკმაყოფილებული.
აქციის მონაწილეებს ჯერ აჭარის მთავრობის წარმომადგენელი ზაზა შაშიკაძე შეხვდა, შემდეგ კი არჩილ ჩიქოვანი, აჭარის მთავრობის აპარატის უფროსი. ჩიქოვანს უშუალოდ დავით ანანიძე ესაუბრა, აქციის მონაწილე. როგორც დავით ანანიძემ აღნიშნა აქციის მონაწილეებთან, მას ჩიქოვანი დაჰპირდა ზეპირ და წერილობით შუამდგომლობას პროკურატურაში, რომ სწრაფად დაიწყოს საქმის გამოძიება.
მიუხედავად დაპირებისა, დავით ანანიძე აცხადებს, რომ კარვები აჭარის მთავრობის სახლთან დარჩება. აქციის მონაწილეები ამბობენ, რომ არ მიაყენებენ ზიანს მუნიციპალურ ქონებას, გაუფრთხილდებიან ნარგავებს და არ დაანაგვიანებენ მიდამოს, თუმცა დარჩებიან მანამ, სანამ არ დაინახავენ მათი პრობლემების მოსაგვარებლად გადადგმულ ქმედით ნაბიჯებს.
