Batumelebi | გამოცხადდა ბერტა ფონ ზუტნერის მშვიდობის პრემია 2020 – საპრიზო ფონდი 3 ათასი ლარია გამოცხადდა ბერტა ფონ ზუტნერის მშვიდობის პრემია 2020 – საპრიზო ფონდი 3 ათასი ლარია – Batumelebi

გამოცხადდა ბერტა ფონ ზუტნერის მშვიდობის პრემია 2020 – საპრიზო ფონდი 3 ათასი ლარია

არასამთავრობო ორგანიზაცია „მშვიდობის ინსტიტუტი პროგრესისთვის“ აცხადებს ბერტა ფონ ზუტნერის მშვიდობის პრემია 2020-ს, რომელიც ჰუმანიტარული საქმიანობისთვის გაიცემა. პრემიის საპრიზო თანხა 3000 ლარია.

როგორც ორგანიზაციის მიერ გამოცხადებული კონკურსის პირობებში ვკითხულობთ, ბერტა ფონ ზუტნერის 2020 წლის მშვიდობის პრემიის მიზანია ხაზი გაუსვას ჰუმანიტარული საქმიანობის მნიშვნელობასა და ხელი შეუწყოს ამ პროცესში ჩართული ადამიანების ფართო საზოგადოებისთვის გაცნობას.

„გლობალურმა პანდემიამ  COVID 19-მა ახალი გამოწვევები გააჩინა ცხოვრების ყველა სფეროში. იზოლაციის პირობებში მცხოვრებ კონფლიქტით გაყოფილ საზოგადოებებს განსაკუთრებით მწვავედ შეეხო აღნიშნული პრობლემა. ახალ რეალობაში ჰუმანიტარულმა საქმიანობამ თანამშრომლობისა და პრობლემის გადაჭრის გზების ძიების დამატებითი შესაძლებლობები შექმნა მშვიდობის მშენებლობის პროცესში,“ – წერს „მშვიდობის ინსტიტუტი პროგრესისთვის“.

ნომინირების პირობები:

  • კანდიდატის წარდგენა შესაძლებელია როგორც ორგანიზაციის მიერ, ასევე ინდივიდუალურად
  • პრემიაზე წარდგენილი ვერ იქნება ორგანიზაცია

ნომინანტის კრიტერიუმები:

  • ნომინანტის ძირითადი საქმიანობა უნდა უკავშირდებოდეს მშვიდობის მშენებლობას
  • გამოკვეთილი უნდა იყოს ნომინანტის ჰუმანიტარული საქმიანობა მშვიდობის მშენებლობის პროცესში
  • კონფლიქტების მშვიდობიანი მოგვარების, ნდობის აღდგენისა და დიალოგის ხელშესაწყობად ახორციელებდეს მულტიფუნქციურ საქმიანობას
  • კანდიდატის ასაკი შეზღუდული არ არის

აპლიკაციების მიღება გრძელდება 2020 წლის 4 აგვისტოს 18:00 საათამდე.

____________________________________________

რა ვიცით ბერტა ფონ ზუტნერის შესახებ?

ბერტა ფონ ზუტნერი 1843 წლის 9 ივნისს პრაღაში დაიბადა ავსტრიელი გენერლის, ფრანც-იოზეფ კინსკი შინიკ უნდ ტეტაუს ოჯახში.   საქართველოში ის დაახლოებული იყო სამეგრელოს დედობლის ეკატერინე დადიანის ოჯახთან. სწორედ მისი მოწვევით ჩამოვიდა ის საქართველოში, სადაც ათი წელი გაატარა.

ბერტა ზუტნერი დღეს ცნობილია, როგორც ავსტრიელი საზოგადო მოღვაწე, პუბლიცისტი, ჟურნალისტი, მწერალი, მშვიდობის ნობელის პრემიის პირველი ლაურეატი ქალი, რომელიც ანტისემიტიზმის წინააღმდეგ და ქალთა უფლებებისთვის იბრძოდა.

ის პირველი ქალია, რომელმაც ნობელის პრემია მიიღო მშვიდობის დარგში.

გასულ წელს ბერტა ფონ ზუტნერის მშვიდობის პრემია საქართველოშიც დაფუძნდა, ამ პროექტის ფარგლებში ითარგმნა ქართულ ენაზე ბერტას რომანი „ძირს იარაღი!“.

1999 წელს ქართულ ენაზე გამოცემული ბერტა ფონ ზუტნერის მემუარები – „ქართველებთან და საქართველოში“ დაცულია საქართველოს ეროვნულ ბიბლიოთეკაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com