ბათუმის მერია ინასარიძის ქუჩის N3-ის მიმდებარედ ახალი სკვერის მოწყობას გეგმავდა, თუმცა სამუშაოების შესყიდვაზე ტენდერი ამ დრომდე არ გამოუცხადებია. პროექტის მიხედვით, ახალი სკვერისთვის ქალაქის ბიუჯეტიდან 1 მილიონ 18 ათას 130 ლარი დაიხარჯება. აქედან, ნახევარი მილიონი – 2020 წელს უნდა დახარჯულიყო, დანარჩენი კი – 2021 წელს. ტერიტორია ჯამში 3 165 კვ/მ-ია.
„ბიუჯეტში გვქონდა გათვალისწინებული, მაგრამ პანდემიის მიზეზით დროებით შეჩერდა გარკვეული ღონისძიებები და მათ შორის ინასარიძის N3-ის მიმდებარედ სკვერის მოწყობის ღონისძიება. ველოდებით სახსრების მობილიზებას. როგორც კი შესაძლებელი გახდება, გამოვაცხადებთ ტენდერს“, – მოგვწერეს ბათუმის მერიის საქალაქო ინფრასტრუქტურისა და კეთილმოწყობის სამმართველოდან.
პანდემიის გამო ბათუმის მერიამ გონიოს ბულვარის ინფრასტრუქტურის მოწესრიგების საკითხიც გადადო, რისთვისაც 390 ათასი ლარი იყო საჭირო.
ადგილი კი, სადაც სკვერი უნდა მოეწყოს, ბათუმში, ინასარიძის ქუჩასა და გენერალ ასლან აბაშიძის ქუჩაზე მდებარე კორპუსებთან [NN:2,3,5] არის ახლოს. ამ ტერიტორიაზე არის მინისტადიონი და სხვადასხვა ატრაქციონი.
ადგილი ინასარიძის ქუჩის მიმდებარედ, სადაც ახალი სკვერის მოწყობაა დაგეგმილი
პროექტით, აქ დაგეგმილია არსებული სტადიონის რეკონსტრუქცია, ახალი ატრაქციონების, შადრევნის, სასეირნო ბილიკების, სკამების, განათების მოწყობა-მონტაჟი.
ამ თემაზე:
ინასარიძის ქუჩაზე ახალი სკვერის მოსაწყობად ბათუმის ბიუჯეტიდან 1 მილიონი დაიხარჯება
