ხელვაჩაურის მიმართულებით მოძრავი მიკროავტობუსის მძღოლებმა მგზავრობის საფასური თვითნებურად გაზარდეს და 50 თეთრის ნაცვლად, მგზავრებს 70 თეთრის გადახდას სთხოვდნენ. მგზავრობის საფასურის გაზრდამ, მოქალაქეების უკმაყოფილება გამოიწვია.
სამგზავრო ტარიფს ადგილობრივი თვითმმართველობა ადგენს. მგზავრობის საფასურის გაზრდაზე კი ბათუმის საკრებულოს არ უმსჯელია.
ბათუმის მერიის საქალაქო ტრანსპორტის განყოფილების უფროსი ემზარ ქავჟარაძე „ბათუმელებთან“ ამბობს, რომ მუნიციპალურმა ინსპექციამ ის კომპანია დააჯარიმა, რომელიც აღნიშნულ მარშრუტზე მგზავრების გადაყვანას უზრუნველყოფს.
„გავაფრთხილეთ კომპანია „აჭარტრანსრეგულირება“, ვისიც არის აღნიშნული მიკროავტობუსები და სანებართვო პირობის დარღვევისთვის 100 ლარით დავაჯარიმეთ. მათ ვალდებულება აქვთ, რომ ორი დღის განმავლობაში გაზრდილი ტარიფის შესახებ ტრაფარეტი მოხსნან და ძველი ტარიფი დააბრუნონ. წინააღმდეგ შემთხვევაში, სხვა სანქციები ამოქმედდება“, – ამბობს ემზარ ქავჟარაძე.
მიკროავტობუსის მძღოლები, რომლებიც ბათუმი-ხელვაჩაურის მარშრუტით მოძრაობენ, დღეს დილიდან გაფიცულები არიან. ისინი აქციის გამართვასაც გეგმავენ. სავარაუდოდ, მათი გაფიცვის მოტივი სამგზავრო ტარიფს უკავშირდება. აქცია დღეს 6 ივნისს, 13:30 საათზეა დაგეგმილი.
მთავარი ფოტო: „ბათუმელების“ არქივიდან.
ამავე თემაზე:
