Batumelebi | პეტიციით საზოგადოებრივი ტრანსპორტის აღდგენას ითხოვენ პეტიციით საზოგადოებრივი ტრანსპორტის აღდგენას ითხოვენ – Batumelebi

პეტიციით საზოგადოებრივი ტრანსპორტის აღდგენას ითხოვენ

არასამთავრობო ორგანიზაცია „ახალგაზრდა თაობა“ პრემიერ გიორგი გახარიას და თბილისის მერს, კახა კალაძეს მიმართავს საზოგადოებრივი ტრანსპორტის მოძრაობის აღდგენის მოთხოვნით და პეტიციას ავრცელებს ,,საზოგადოებრივი ტრანსპორტის დაუყოვნებლივ აღდგენის მოთხოვნით”,  წინააღმდეგ შემთხვევაში ორგანიზაცია საპროტესტო აქციებს გეგმავს.

„23 მაისის საქართველოს მთავრობის #322 დადგენილება, ისევე, როგორც დ.ხუნდაძის აწ უკვე მიღებული ცვლილება “საზოგადოებრივი ჯანდაცვის შესახებ” კანონი თავისი აკრძალვებით არის ანტიკონსტიტუციური და ირღვევა ადამიანის უფლება თავისუფლად გადაადგილების შესახებ.

საერთაშორისო გამოცდილების და მაგალითების გათვალისწინებით, მსოფლიოს არც ერთ ქვეყანაში არ გაჩერებულა საზოგადოებრივი ტრანსპორტი და ასევე, ანტიკრიზისული გეგმის თანახმად

  1. 15 ივნისს იხსნება შიდა ტურიზმი;
  2. 1-ელ ივლისს იხსნება გარე / საერთაშორისო ტურიზმი;

ჩნდება კითხვა – როგორ გადავაადგილდეთ ქალაქებს შორის? აეროპორტიდან ქალაქამდე და პირიქით?“ – წერია „ახალგაზრდა თაობის” მიერ გავრცელებულ პეტიციაში.

საგანგებო მდგომარეობის გაუქმების შემდეგ საქართველოში კვლავ აკრძალულია საზოგადოებრივი ტრანსპორტი. პარლამენტის მიერ „საზოგადოებრივი ჯანდაცვის“ შესახებ კანონში შეტანილი ცვლილებებით, საგანგებო მდგომარეობის გარეშე შეზღუდვების შენარჩუნება 15 ივლისამდეა შესაძლებელი. შესაბამისად, მთავრობის დადგენილების ვადაც 15 ივლისამდეა განსაზღვრული, თუმცა ეს არ გამორიცხავს, რომ მთავრობამ შეზღუდვები მანამდე ეტაპობრივად მოხსნას.

__________

ფოტო „ბათუმელების“ არქივიდან

ამავე თემაზე: 

როგორ დარეგულირდება მიმოსვლა 23 მაისიდან – მთავრობის დადგენილება

 

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com