Batumelebi | საფრანგეთის ექსპრეზიდენტს ჟურნალისტი სექსუალურ შევიწროებაში ადანაშაულებს საფრანგეთის ექსპრეზიდენტს ჟურნალისტი სექსუალურ შევიწროებაში ადანაშაულებს – Batumelebi

საფრანგეთის ექსპრეზიდენტს ჟურნალისტი სექსუალურ შევიწროებაში ადანაშაულებს

პარიზის პროკურატურამ დაიწყო გამოძიება საფრანგეთის ექსპრეზიდენტის, ვალერი ჟისკარ დესტენის წინააღმდეგ – წერს BBC.

94 წლის ექსპრეზიდენტს გერმანელმა ჟურნალისტმა, ენ-კატრინ სტრაკემ, უჩივლა 10 მარტს. ჟურნალისტი ამბობს, რომ ჟისკარ დესტენი, რომელიც მაშინ 92 წლის იყო, უხამსად ეხებოდა მას 2018 წელს ინტერვიუს შემდეგ, ფოტოების გადაღებისას.

ჟურნალისტი საჩივარში წერს, რომ  რამდენჯერმე მთელი ძალით სცადა დესტენის მოშორება და, ასევე, ოპერატორი ფოტოს გადაღებისას ცდილობდა პრეზიდენტის ყურადღების გადატანას და ამისათვის საგანგებოდ დააგდო ტორშერი.

ტელეარხ France 24-ის ცნობით, რედაქციამ, სადაც ჟურნალისტი მუშაობს, საკუთარი გამოძიება ჩაატარა. ოპერატორი ადასტურებს ჟურნალისტის ნაამბობს, ხოლო ხმის ოპერატორი, რომელიც ასევე იმყოფებოდა ინტერვიუზე, უარს ამბობს ჩვენების მიცემაზე.

„გადავწყვიტე, მომეყოლა იმის შესახებ, რაც შემემთხვა, ვფიქრობ, ადამიანებმა უნდა იცოდნენ, რომ საფრანგეთის ყოფილი პრეზიდენტი სექსუალურად მავიწროებდა ინტერვიუს შემდეგ,“ – განაცხადა ჟურნალისტმა გერმანულ ტელეარხ WDR-თან ინტერვიუში.

ყოფილი პრეზიდენტის წარმომადგენლებმა რამდენჯერმე განაცხადეს, რომ ექსპრეზიდენტს არ ახსოვს ის მოვლენები, რაზეც ჟურნალისტი საუბრობს.

ვალერი ჟისკარ დესტენი საფრანგეთის პრეზიდენტი იყო 1974-1981 წლებში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com