საზოგადოებრივი მაუწყებლის აჭარის ტელევიზიის და რადიოს გადაცემა „ჰეშთეგის“ წამყვანს, ალტერნატიული პროფკავშირის თავმჯდომარეს მალხაზ რეხვიაშვილს მაუწყებლიდან გათავისუფლების შემდეგ სამსახურს სთავაზობენ.
“გადაცემა “ჰეშთეგის” წამყვანი და ალტერნატიული პროფკავშირების თავმჯდომარე, მალხაზ რეხვიაშვილი ფეისბუქზე დაწერილი პოსტის გამო მაუწყებლიდან გაუშვეს. “პლატფორმა-სოციალური სამართლიანობისთვის” ამზადებს გადაცემა “ათვლის კუთხეს”, რომელიც გადის აჭარის საზოგადოებრივ მაუწყებელზე. ორგანიზაციის ხელმძღვანელის, ნათია ქარჩილაძის გადაწყვეტილებით, მალხაზ რეხვიაშვილს ვუკეთებთ საჯარო შეთავაზებას, დაემატოს “ათვლის კუთხის” გუნდს თანაწამყვანის ამპლუაში და ამ გზით გააგრძელოს საზოგადოებრივი მაუწყებლის იდეისთვის სამსახური,” – წერს “ათვლის კუთხის” წამყვანი გიორგი არობელიძე.
მალხაზ რეხვიაშვილი “ბათუმელებთან” საუბარში ამბობს, რომ აპირებს “ათვლის კუთხის” შეთავაზებას დათანხმდეს.
მალხაზ რეხვიაშვილი აჭარის მაუწყებლიდან დღეს, 11 მაისს, გაათავისუფლეს ფეისბუქზე 21 აპრილს დაწერილი პოსტის გამო.
