ბათუმში თურქეთის გენერალური საკონსულოს ინფორმაციით, იმ ოჯახებს, რომლებიც თურქეთში სეზონურ სამუშაოდ წასვლას ვერ ახერხებენ, საკონსულოს ორგანიზებით, 500 სასურსათო კალათს გადასცემენ.
როგორც თურქეთის საკონსულოში „ბათუმელებს“ უთხრეს, ოჯახებს ადგილობრივ თვითმმართველობებთან ერთად არჩევენ. „არიან ოჯახები, რომლებიც უშუალოდ საკონსულოს მოგვმართავენ დახმარებისთვის, სხვა შემთხვევაში კი, მუნიციპალიტეტები გვაწვდიან ინფორმაციას. სოლიდარობის ფარგლებში 2 600 სასურსათო კალათა დარიგდა უკვე და 15 ტონა ფქვილი. ამ აქციაში ჩართული იყო საქველმოქმედო ორგანიზაცია Tika, რომელმაც 300 სასურსათო კალათა დაარიგა. ამჯერად კი 500 სასურსათო კალათა დარიგდება ქობულეთში, ოზურგეთსა და აჭარის მაღალმთიანეთში“, – გვითხრეს საკონსულოში.
ამ ეტაპზე აქციაში კომპანია Gökşin-ია ჩართული, რომელიც უზრუნველყოფს 500 სასურსათო კალათის გადაცემას იმ ოჯახებისთვის, რომელთა წევრებიც თურქეთში სეზონურ სამუშაოს ასრულებდნენ. როგორც წესი, ჩაის კრეფის სეზონი მაისის ბოლოს იწყება.
