მთავარი,სიახლეები

ტურიზმის სექტორი ქონების გადასახადისგან გაათავისუფლეს, საშემოსავლო – გადაუვადეს

07.05.2020 • 1309
ტურიზმის სექტორი ქონების გადასახადისგან გაათავისუფლეს, საშემოსავლო – გადაუვადეს

პრემიერ-მინისტრ გიორგი გახარიას განცხადებით, საქართველოში ტურიზმის სექტორი 2020 წლის ქონების გადასახადისგან გათავისუფლდება. ეს პრემიერმა რამდენიმე წუთის წინ [14:30], მთავრობის სხდომაზე, ტურიზმის გახსნის გეგმის წარდგენისას განაცხადა.

გარდა ამისა, ტურიზმის სექტორში მომუშავე კომპანიების საშემოსავლო გადასახადები გადავადდება 2020 წლის ბოლომდე.

„ვერ დავპირდებით სრულ ჩამოწერას. სასტუმროებს დავპირდით სესხის სუბსიდირებას და გავაკეთეთ, რამდენიმე ათასმა ბიზნესოპერატორმა და კომპანიამ ისარგებლა ამ შეთავაზებით. გარდა ამისა, ჩვენ დავასუბსიდირებთ სასტუმროებს, რომელთა ბრუნვაც არის 20 მილიონამდე ლარი, ხუთი მილიონის სესხის პროცენტის 80 პროცენტს“, – განაცხადა პრემიერმა.

მთავრობის ინფორმაციით, საქართველო უცხოელ ტურისტებს პირველი ივლისიდან მიიღებს.

„15 ივნისიდან საქართველო გაიხსნება ადგილობრივი ტურიზმის სერვისების მიწოდებისთვის, ხოლო პირველი ივლისიდან  საქართველო იქნება მზად იმისთვის, რომ მიიღოს უცხოელი ტურისტები,“ – თქვა პრემიერმა.

პრემიერ-მინისტრის განცხადებით, ტურიზმი არის ის დარგი, რომელიც პანდემიის შემდეგ პოსტკრიზისულ ეკონომიკაში საქართველოს განვითარებას შეუწყობს ხელს.

პრემიერის თქმით, მთავრობა იწყებს სექტორალურ მხარდაჭერას და შემდეგი იქნება სოფლის მეურნეობა, მშენებლობა და განათლება.

გადაბეჭდვის წესი


ასევე: