2011 წელს 1 მილიონ დოლარად ნაყიდი სახელმწიფო ქონება მესაკუთრემ 9 წლის შემდეგ 13 მილიონ დოლარად გაყიდა. საუბარია ბათუმში, მემედ აბაშიძის ქუჩაზე მდებარე პირველი აფთიაქის შენობაზე, რომელიც კულტურული მემკვიდრეობის ძეგლია. თუმცა, მის მოსავლელად და შესანარჩუნებლადაც ინვესტორს ერთი თეთრიც არ დაუხარჯავს.
შპს „ჟასმინის“ 90 პროცენტს ფლობდა თურქეთში დაფუძნებული კომპანია – „მელს თურიზმ გიდა ვე ინშაათ სანაი“. შენობის გაყიდვის შემდეგ მას 11 812 500 დოლარი შეხვდა. დარჩენილ ათ პროცენტს თურქეთის მოქალაქე მემეთ ქოჩარსლანი ფლობდა, რომელმაც თავისი წილები თითქმის 2 მილიონ დოლარად გაყიდა.
ქონების ახალი მფლობელი „მეტრო ჰოლდინგის“ დამფუძნებელი გალიფ ოზთურქია, რომელმაც 2019 წლის დეკემბერში პირველი აფთიაქის შენობა შპს „ჟასმინისგან“ გამოისყიდა.
კომპანიის წილებში გალიფ ოზთურქმა 42 მილიონი ლარი [13 მილიონზე მეტი აშშ დოლარი] გადაიხადა. შესაბამისად, ის გახდა ბათუმის ცენტრში, ევროპის მოედანთან არსებული ორსართულიანი კულტურული მემკვიდრეობის ძეგლის მფლობელი. მანვე აიღო ის ვალდებულებები, რაც შპს „ჟასმინს“ აჭარის მთავრობამ 2011 წელს გაფორმებულ ხელშეკრულებაში ჩაუწერა.
მეტრო ჰოლდინგს მოუწევს იმ პირგასამტეხლოს გადახდაც, რაც ამ დრომდე შპს „ჟასმინს“ შეუსრულებელი ვალდებულებების გამო ერიცხებოდა. ეს თანხა ორ მილიონ ლარს აჭარბებს. 2011 წელს კომპანიამ აფთიაქის შენობაში ამ თანხაზე ბევრად ნაკლები – 1 მილიონი დოლარი გადაიხადა.
ხელშეკრულებით ნაკისრი ვალდებულებების თანახმად, აფთიაქის ყოფილ შენობაში ინვესტორი სასტუმროს მოწყობას გეგმავდა, სადაც სამი წლის განმავლობაში საქართველოს არანაკლებ 80 მოქალაქე უნდა დაესაქმებინა.
ხელშეკრულების დადების შემდეგ, შპს ჟასმინმა გამოისყიდა დუმბაძის ქ #16-18/მ.აბაშიძის ქ#34 მდებარე შენობაში არსებული კერძო ფართობი და სასტუმრო-კომპლექსის მშენებლობისთვის პროექტი მოამზადა. ამ პროექტის მიხედვით შენობის უკანა მხარეს 11 სართული უნდა აეშენებინათ. დაახლოებით ისე, როგორც იქვე მდებარე ფოსტის შენობას დააშენეს.
