აჭარის ჯანდაცვის მინისტრის მოადგილის, ნინო ნიჟარაძის განცხადებით, ახალი კორონავირუსის გავრცელებიდან დღემდე აჭარაში 5 500-ზე მეტი ტესტი ჩატარდა Covid-19-ის გამოსავლენად, მათ შორის გამოკვლეული იქნა 1400-ზე მეტი სამედიცინო პერსონალი.
„1400-ზე მეტი სამედიცინო პირია გამოკვლეული აჭარაში, მათგან ვირუსი არც ერთს არ დაუდასტურდა. ისინი 14 დღეში ერთხელ დაექვემდებარებიან ლაბორატორიულ დიაგნოსტიკას,“ – განაცხადა ნინო ნიჟარაძემ, აჭარის ჯანდაცვის მინისტრის მოადგილემ.
სავალდებულო ლაბორატორიულ დიაგნოსტიკას გადიან საკარანტინო სივრცეში მყოფი ადამიანებიც, კარანტინიდან გასვლამდე 24 საათით ადრე. დღეს, 6 მაისს, 230 პირს აუღებენ ანალიზს აჭარაში კარანტინის დატოვებამდე.
ასევე, ტესტირება ჩაუტარდა საკარანტინო სივრცეში დასაქმებულ 250 პირს და მათი ანალიზის პასუხებიც Covid19-ზე უარყოფითია.
ნინო ნიჟარაძემ აღნიშნა, რომ მიზნობრივ ჯგუფებს, რომელთაც ტესტირება ჩაუტარდებათ, შეურთდნენ მებაჟეები და თავშესაფარში მცხოვრები პირები. ასევე, იგეგმება სუპერმარკეტებსა და აფთიაქებში დასაქმებული პირების ტესტირება.
რაც შეეხება ქობულეთის კლასტერს, რომელსაც აჭარაში 36 პირის Covid19-ით ინფიცირება უკავშირდება, მინისტრის მოადგილის განცხადებით, ქობულეთის სამივე სოფელში ინფიცირებულებთან კონტაქტირებული ყველა პირის იზოლაციის პერიოდი დასრულდა და უკვე მიმდინარე კვირის ბოლოს ორი ინკუბაციური პერიოდი მიილევა:
„მაგრამ რაც შეეხება ქალაქის ტერიტორიას, აქ უკანასკნელ გამოვლენილ დადასტურებულ შემთხვევასთან კონტაქტირებული 16 პირი რჩება იზოლაციის რეჟიმში, შესაბამისად, ეს ტერიტორია მაინც რჩება მაღალი რისკის ზონად.
სავარაუდოდ, ამ სოფლების გახსნაზე საუბარი იქნება საკოორდინიციო საბჭოს გადაწყვეტილების შემდეგ,“ – აღნიშნა ნინო ნიჟარაძემ.
დღეს, 6 მაისს, უკვე მეექვსე დღეა აჭარაში Covid19-ის ახალი შემთხვევა არ გამოვლენილა.
ჯამში აჭარაში 36 ადამიანი განიკურნა კორონავირუსისგან, ისინი რეაბილიტაციას გადიან შესაბამის საკარანტინო სივრცეში ან თვითიზოლაციაში.
6 მაისის მონაცემებით [11 სთ], საქართველოში კორონავირუსის 610 დადასტურებული შემთხვევაა, მათ შორის გამოჯანმრთელდა 269 ადამიანი, გარდაიცვალა – 9. კარანტინის რეჟიმში იმყოფება 5133 პირი, სტაციონარში მეთვალყურეობის ქვეშ – 523.
__________
ფოტოზე: NCDC- აჭარის სამმართველოს სამედიცინო პერსონალი ლაბორატორიაში. წყარო: nplg.gov.ge
