„ეს შემთხვევა სადაც მოხდა, იქ არის განთავსებული სასტუმროს ვიდეოსათვალთვალო კამერები. ამ ჩანაწერებს გამოძიება სასამართლოს განჩინებით ამოიღებს,“ – ამბობს პაატა დიასამიძე, საია-ს აჭარის ფილიალის ხელმძღვანელი ბათუმში 2 აპრილს მომხდარ შემთხვევაზე – მოქალაქის თქმით, კომენდანტის საათის დროს მას პოლიციელებმა სცემეს და იარაღით დაემუქრნენ.
მოქალაქემ პოლიციელებთან მომხდარი ფიზიკური დაპირისპირების შესახებ 3 აპრილს „ბათუმელებთან“ ისაუბრა. 4 აპრილს სახელმწიფო ინსპექტორის აპარატმა გამოძიება დაიწყო. ეს უწყება იძიებს სამართალდამცველთა მხრიდან სავარაუდო დანაშაულის ჩადენის ფაქტებს. იმავე დღეს, 4 აპრილს, ბათუმში მყოფმა პრემიერმა გახარიამ განაცხადა, რომ აჭარის პოლიციის უფროსს ამ თემაზე დაელაპარაკებოდა.
შედგა თუ არა საუბარი პრემიერსა და აჭარის პოლიციის უფროსს, კოტე ანანიაშვილს შორის? – ვკითხეთ შინაგან საქმეთა სამინისტროს, სადაც გვითხრეს, რომ კოტე ანანიაშვილი განმარტებას ვერ გააკეთებს.
მოქალაქის ინტერესებს საია იცავს. იურისტი პაატა დიასამიძე ამბობს, რომ ამ ეტაპზე მოქალაქისთვის დაზარალებულის სტატუსი არ მიუნიჭებიათ, თუმცა ის უკვე გამოკითხეს და აქტიურად მიმდინარეობს საგამოძიებო მოქმედებები. მოქალაქემ სოციალურ ქსელში ასევე ამოიცნო ის პოლიციელები, ვისთანაც 2 აპრილის ღამეს კონფლიქტი ჰქონდა.
„მის სხეულზე არსებული დაზიანებები დათვალიერდა და გაიგზავნა ექსპერტიზაზე, ველოდებით პასუხს,“ – დასძინა პაატა დიასამიძემ.
პაატა დიასამიძის თქმით, სასტუმროში, სადაც ვიდეოსათვალთვალო კამერებია დამონტაჟებული, დაადასტურეს ვიდეოჩანაწერების არსებობა. ჩანაწერი ამ დროისთვის ამოღებული არ არის.
სახელმწიფო ინსპექტორის აპარატში გვითხრეს, რომ გამოძიება ძალადობით სამსახურებრივი უფლებამოსილების გადამეტების ფაქტზე მიმდინარეობს სისხლის სამართლის კოდექსის მე-3 ნაწილის ბ ქვეპუნქტით და ტარდება საგამოძიებო, ასევე საპროცესო მოქმედებები. სხვა დეტალებს უწყება ჯერ არ ასაჯაროვებს.
