ნეტგაზეთი • RU

დაველაპარაკებით აჭარის პოლიციის ხელმძღვანელს – გახარია პოლიციის მხრიდან შესაძლო ძალადობაზე

დღეს, 4 აპრილს, ბათუმში ჩამოსულ საქართველოს პრემიერ-მინისტრს, გიორგი გახარიას კითხვა დაუსვეს კომენდანტის საათის პირობებში პოლიციელების მხრიდან აგრესიულ ქმედებაზე.

სტატია ბათუმში მცხოვრები პირის შესახებ, რომელიც ამბობს, რომ კომენდანტის საათის დროს იგი პოლიციელებმა სცემეს, „ბათუმელებმა“ გამოაქვეყნა.

„პოლიციელები ზრუნავენ ჩვენს მოქალაქეებზე, შეიძლება იყოს ერთეული გამონაკლისები, ამაზე დღეს დაველაპარაკებით აჭარის პოლიციის ხელმძღვანელს და გავერკვევით“ – განაცხადა გიორგი გახარიამ.

პრემიერ-მინისტრის კომენტარს აჭარის საზოგადოებრივი მაუწყებელი ავრცელებს.ბათუმელი ვ.მ. ადმინისტრაციული წესით 2 აპრილს, დაახლოებით ღამის 11 საათზე დააკავეს.

ადმინისტრაციული სამართალდარღვევის საქმე 3 აპრილს განიხილა მოსამართლე ჯუმბერ ბეჟანიძემ.

მოქალაქის თქმით, იგი პოლიციელებისთვის წინააღმდეგობის გაწევის მუხლით დააკავეს და 500 ლარით დააჯარიმეს. უცნობია, მას ედავება თუ არა პოლიცია კომენდანტის საათის პირობების დარღვევის გამო.

„პოლიციელები ყვირილით მომვარდნენ, არ იცი, რომ კომენდანტის საათიაო? აგდებულად მითხრეს, რა ანტიბიოტიკი გინდაო. ვუთხარი, თქვენ ძველი ბიჭები ხართ, თუ პოლიციელები-მეთქი და მობილური ამოვიღე, რომ გადამეღო. ამაზე გაბრაზდა ერთ-ერთი და ძალით ჩამსვეს მანქანაში… მანქანაში მირტყამდა, თან ჩემთვის შარვლის გახდას ცდილობდა, არ ამბობდა, რა უნდოდა, შემეშვით-მეთქი, ვყვიროდი,“ – ყვება მოქალაქე. მან გვაჩვენა სხეულზე მიყენებული დაზიანებების ამსახველი ფოტოებიც.

_____________________________

ფოტოზე: დაზიანებები პოლიციის მიერ დაკავებული კაცის სხეულზე

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com