ბათუმის სახელმწიფო საზღვაო აკადემია ფოთში ახალ ფილიალს ხსნის. თანამედროვე ტექნოლოგიური სტანდარტებით აღჭურვილი საზღვაო სასწავლებელი 1000 სტუდენტზე იქნება გათვლილი.
საზღვაო აკადემიის ფილიალი ჰიდრომელიაციური ტექნიკუმის ისტორიულ შენობაში განთავსდება. შენობის რეაბილიტაცია უკვე დაიწყო და კონტრაქტის პირობების თანახმად, 9 თვეში უნდა დასრულდეს.
სამუშაოების შესრულებაზე საზღვაო აკადემიამ ხელშეკრულება შპს „დანი ქონსთრაქშენთან“ 5 851 164 ლარზე გააფორმა.
ფოთში, წმინდა გიორგის ქუჩაზე მდებარე ყოფილი ჰიდრო-მელიორაციული ტექნიკუმის შენობა კულტურული მემკვიდრეობის ძეგლია.
მისი მშენებლობა 1935 წელს დაიწყო, ექსპლუატაციაში კი 1937 წელს შევიდა. პროექტის ავტორი უკრაინელი არქიტექტორი დიაჩენკო იყო.
ტექნიკუმი თავდაპირველად 450 მოსწავლეზე იყო გათვლილი. რომელთა რიცხვი გასული საუკინის 70-იან წლებში 780-მდე გაიზარდა.
შენობა სტალინური ეპოქის მონუმენტალური არქიტექტურის ნიმუშია. მთავარი ფასადის არქიტექტურული ელემენტი იონური სვეტების, ნახევარსვეტების რიგით, 3 პორტალის სახით არის წარმოდგენილი. კედლები და კარ-ფანჯრები კი არშიებით არის გაფორმებული.
წლების განმავლობაში ფასადების არქიტექტურულ ელემენტებს მნიშვნელოვანი ცვლილება არ განუცდია. შენობის ფასადები უმნიშვნელოდ არის სახეცვლილი.
„შენობის მდგომარეობა საშუალებას იძლევა მაქსიმალურად დავუბრუნოთ პირვანდელი სახე,“ – ნათქვამია შენობის არქიტექტურული პროექტის აღწერაში.
რესტავრაციის პროექტი ითვალისწინებს ფასადების, შიდა პერიმეტრის რეაბილიტაცია-ადაპტაციას, ასევე ერთი სრული სართულის დაშენებას ღერძებში. ასევე დამოუკიდებელი შენობა-ნაგებობის მოწყობას ნაკვეთის პერიმეტრზე. მოეწყობა ფიტნეს დარბაზი, საქვაბე, ღია სპორტული მოედანი, სკვერი, პარკინგი, საავტომობილე და საფეხმავლო ბილიკი.
პროექტის რენდერი – ასეთი იქნება ისტორიული შენობა რეაბილიტაციის შემდეგ
„სამშენებლო სამუშაოების პროცესში გათვალისწინებული უნდა იქნეს კულტურული მემკვიდრეობის უძრავ ძეგლთა მიმართ საქართველოში მოქმედი კანონი. მკაცრად იქნეს დაცული სამშენებლო ნორმები და წესები. ხოლო სამუშაოთა წარმოების პროცესში ცვლილების შეტანის აუცილებლობა უნდა შეთანხმდეს მთავარ არქიტექტორთან და საპროექტო ჯგუფთან,“ – ნათქვამია შენობის არქიტექტურული პროექტის აღწერაში.
შენობის არქიტექტურული პროექტი ფოთის მუნიციპალიტეტის დაკვეთით 2019 წელს „საქართველოს ტექნიკურმა ჯგუფმა“ მოამზადა.
ფოთში ბათუმის სახელმწიფო საზღვაო აკადემიის ფილიალის გახსნა 2021 წელსაა დაგეგმილი. სასწავლებელი პირველ ეტაპზე მხოლოდ პროფესიულ განათლებაზე იქნება ორიენტირებული.
საქართველოს მთავრობის გადაწყვეტილებით, ბათუმის აკადემიას თანხას საგანმანათლებლო და სამეცნიერო ინფრასტრუქტურის განვითარების სააგენტო ეტაპობრივად გამოუყოფს – აკადემიასა და შესაბამის კონტრაქტორ კომპანიას შორის შენობის რეაბილიტაციაზე გაფორმებული ხელშეკრულების პირობების შესაბამისად.
საზღვაო ტრანსპორტის სააგენტომ, ბათუმის სახელმწიფო საზღვაო აკადემიამ, ქალაქ ფოთის მუნიციპალიტეტის მერიამ და სამეგრელო-ზემო სვანეთის გუბერნატორმა ქალაქ ფოთის ტერიტორიაზე ბათუმის სახელმწიფო საზღვაო აკადემიის ფილიალის დაარსების შესახებ მემორანდუმს ხელი 2019 წლის 5 მაისს მოაწერეს.
ასე გამოიყურება ჰიდრო-მელიორაციული ტექნიკუმის შენობა ახლა
