Batumelebi | როდის უნდა გადაიხადო 3 ათასი, თუკი კომენდანტის საათის დროს დაგაჯარიმეს როდის უნდა გადაიხადო 3 ათასი, თუკი კომენდანტის საათის დროს დაგაჯარიმეს – Batumelebi
RU | GE  

როდის უნდა გადაიხადო 3 ათასი, თუკი კომენდანტის საათის დროს დაგაჯარიმეს

გუშინ კომენდანტის საათის დარღვევისთვის, შინაგან საქმეთა სამინისტროს ბოლო მონაცემებით, 204 პირი დააჯარიმეს. გუშინდელი მონაცემებით, ქვეყნის მასშტაბით, 60 სამართალდარღვევა დაფიქსირდა, მათ შორის, 17 დაჯარიმდა.

შსს-ს პრესცენტრში  კონკრეტულ შემთხვევებზე არ მოგვაწოდეს ინფორმაცია – მაგალითად, ბათუმში, ჭავჭავაძის ქუჩაზე გუშინ ღამით ორი ავტომანქანა შეაჩერა საპატრულო პოლიციამ.

კომენდანტის საათის, ასევე საგანგებო რეჟიმის პირობების დარღვევის შემთხვევაში ფიზიკური პირი 3 ათასი ლარით, ხოლო იურიდიული პირი – 15 ათასი ლარით ჯარიმდება.

როდის უნდა გადაიხადოს ადამიანმა ჯარიმა, თუკი იგი სამართალდარღვევის ჩადენის ფაქტს არ ეთანხმება და ჯარიმის შესახებ პოლიციელების მიერ გამოწერილი ოქმის გასაჩივრებას აპირებს?

„ამ შემთხვევაში ჯარიმის აღსრულების პროცედურა აითვლება საგანგებო მდგომარეობის დასრულების შემდეგ, რადგან მანამდე გასაჩივრების მოქმედების ვადა შეჩერებულია,“ – განმარტავს პაატა დიასამიძე, „ახალგაზრდა იურისტთა ასოციაციის“ აჭარის ფილიალის ხელმძღვანელი.

იურისტის თქმით, მოქალაქეებს ახლაც შეუძლიათ ჯარიმის გასაჩივრება და საგანგებო რეჟიმის დასრულების შემდეგაც, ანუ 22 აპრილიდან, ხოლო თუ მას არ გაასაჩივრებენ, ერთ თვეში უნდა დაფარონ ჯარიმა. ჯარიმა შესაძლოა გასაჩივრდეს, როგორც ზემდგომ ადმინისტრაციულ ორგანოში, ისე სასამართლოში.

დაჯარიმებულმა ჯარიმის ოქმის შედგენიდან 10 დღეში უნდა მიმართოს სასამართლოს, თუმცა საგანგებო რეჟიმის გამო შესაძლოა დაჯარიმებულმა გასაჩივრების უფლებით ისარგებლოს საგანგებო რეჟიმის დასპრულების შემდეგაც, ანუ მანამდე აღსრულების პროცესი ვერ დაიწყება.

„სასამართლო საჩივრის მიღების შემდეგ იწყებს საქმის წარმოებას და აჩერებს აქტის მოქმედებას, რომლითაც მოქალაქე დაჯარიმდება, ვიდრე სასამართლო გადაწყვეტილებას არ მიიღებს,“ – აღნიშნავს პაატა დიასამიძე.

თუკი სასამართლო მოქალაქის საჩივარს არ დააკმაყოფილებს, ჯარიმის გადასახდელად ისევ ერთთვიანი ვადა არსებობს. შემდეგ უკვე იძულებითი აღსრულების პროცედურა იწყება.

____

მთავარი ფოტო: ბათუმში, ჭავჭავაძის გამზირზე პოლიციამ კომენდანტის საათის დარღვევისთვის გააჩერა ორი მსუბუქი ავტომანქანა, რომელშიც ახლგაზრდა კაცები ისხდნენ.

ნეტგაზეთის მასალების სხვა გამოცემებში გადაბეჭდვის წესი
ავტორი