ბოლო რამდენიმე დღეა, საგანგებო მდგომარეობის გამოცხადების პარალელურად, როცა მთელი ქვეყანა და მსოფლიო შინიდან არ გამოდის, საბავშვო მწერალმა ვასილ გულეურმა საკუთარი ზღაპრებისა და ლექსების ხმოვანი ვერსიების ნაწილი ატვირთა youtube არხზე. ამ არხის ჩანაწერებით პატარებს შეუძლიათ მოისმინონ ავტორის მონათხრობი.
ვასილ გულეური ყოველ სამშაბათს, ხუთშაბათსა და შაბათს, 21:00 საათზე, ბავშვებისთვის სხვა ტექსტებსაც კითხულობს. ლაივჩართვები კვირაში სამჯერ მწერალთა სახლის ფეისბუქგვერდზეა.
„როგორ დაკარგა ნაკადულმა თავი“
ზღაპარი მთის ნაკადულზეა, რომელიც თავიდან მშვიდად მორაკრაკებდა, მცენარეებსა და ჩიტებს წყურვილს უკლავდა და აგრილებდა, მისი შხეფებით მოსულიერებული ბოლოქანქარები და ყვავილები ნაკადულის შექებას არ იშურებდნენ, ისიც უანგაროდ რწყავდა არემარეს, მაგრამ მას შემდეგ, რაც წვიმის ნაკადებმა ნაკადულის დინება გააძლიერეს და აასწრაფეს, ის შეიცვალა, ხმაც რიხიანი გაუხდა და ტყის ცხოველებსა და ყვავილებსაც აგდებით დაუწყო ლაპარაკი. ეს ზღაპარი თავნება ნაკადულებზეა, რომლებიც თუ მთის ნაკადულების უბრალოებას დაკარგავენ, ძალიან უინტერესო რამეებად ქცევა ელით.
„რატომ აქვს კურდღელს გრძელი ყურები“
წარმოგიდგენიათ, რომ ოდესმე ყველა კურდღელს პატარა და მრგვალი ყურები ჰქონდა? თურმე ჰქონდა და იუთუბიზე ერთი კვირის წინ დადებული ზღაპარი უკვე ათასამდე ადამიანმა მოისმინა. მოკლეყურება ბაჭიამ თურმე ერთხელ გრძელყურა, პატარა ვირს დასცინა. ბაჭიას დაცინვა არ შერჩა, შავმა ყვავმა ის ჯადოსნური სიტყვებით დაწყევლა და ბაჭიას მთელ მოდგმას ვირივით დიდი ყურების ტარება უსურვა. როგორ მოხდა ეს ამბავი, ზღაპრის ავტორი თავად უამბობს პატარებს.
„როგორ გაჩნდა ქარი“
თურმე ქარი გაჩნდა უკიდურეს ჩრდილოეთში, ატლანტის ოკეანის სანაპიროზე, მაშინ, როცა ჯერ კიდევ არ არსებობდა ფაბრიკა-ქარხნები და როცა ჰაერში ამდენი გამონაბოლქვი არ იყო. როცა ქარი ძლიერად ქრის და ზუზუნებს, თუ ყურს დაუგდებ, თურმე შეგიძლია მოისმინო მისი დაბადების ამბავი, როგორ გამოძვრა მჭედლების საბეველებიდან და დაიწყო ქროლვა მთელ დედამიწაზე.
,,ტრამვაი და პატარა გოგონა“
ზღაპარი გოგონას და ახალშეღებილი, წითელი ტრამვაის მეგობრობაზეა, რომელიც ეს-ესაა გაუშვეს რელსებზე ქალაქის ძველ უბანში. ტრამვაის ახალი ვაგონი ქალაქის ბევრ სხვადასხვა ქუჩას, მათ შორის, ყვავილების და ცისარტყელას ქუჩებს გადის, მაგრამ ვაგონის საყვარელი ქუჩა მაინც ღიმილის ქუჩაა, სადაც მას გაჩერებაზე დედასთან ერთად ყოველდღე ელოდება პატარა გოგო.
„თეთრი დათვი და მურა დათვი“
ამ ,,ზღაპარლექსში“ თეთრი დათვი არქტიკიდან მიემგზავრება სტუმრად ევროპაში, სადაც მისი ბიძაშვილი მურა დათვი ცხოვრობს. ევროპაში ბევრი გასართობია, კაფეები და ბარები, დათვილენდები და სანაყინეები, მაგრამ ყველაფრის ნახვის და დათვალიერების შემდეგ თეთრი დათვი ევროპაში მოიწყენს…
„მთვარის შოკოლადი“
ალექსანდრე 6 წლის ჩვეულებრივი ბიჭია და თექვსმეტსართულიან კორპუსში ცხოვრობს, კორპუსს ლიფტი აქვს, თითს დააჭერ რომელი სართულის ღილაკსაც გინდა და ახვალ. ბიჭი ერთ მშვენიერ დღეს დიდ უცნაურობაში გაეხვევა, ლიფტი არ გაჩერდება მის სართულზე, სულ მაღლა და მაღლა დაიწყებს ასვლას და ას სამოცდაერთიათას ხუთას მეთოთხმეტე სართულზე ავა. ლიფტიდან გამოსული მთვარეზე აღმოჩნდება, იმ მთვარეზე, რომელსაც ღამღამობით უყურებდა ფანჯრიდან. საოცარი სურნელით იგრძნობს, რომ მთვარე თურმე თეთრი შოკოლადია, შორიდან რომ უსწორმასწორო ზედაპირი მოუჩანდა, ეს ამობურცულები უზარმაზარი თხილის გულები ყოფილა.
„პინგვინის მაცივარი“
ანტარქტიდაში დათბება და ყინული დნობას დაიწყებს, პინგვინი ხვდება, რომ თუ მაცივარს არ იყიდის, მისი საქმე ცუდად წავა და თევზისა და მოლუსკების მარაგს ვერსად შეინახავს. თანაც ხედავს, რომ სელაპამა უკვე წინასწარ გათვალა ყველაფერი და მაცივარი დროულად იყიდა. გლობალური დათბობისგან შეშფოთებული პინგვინი ანტარქტიდის ყველა დიდ მაღაზიაში დადის და მაცივრებს არჩევს.
