1-ელი აპრილიდან უფასო სასადილოები დაიკეტება. იმ ადამიანებს კი, ვინც ამ სასადილოებით სარგებლობდა, ერთი თვის მარაგს სახლში მიუტანენ.
ბათუმის მუნიციპალური სასადილო, რომელიც ჯავახიშვილის ქუჩაზე მდებარეობს და აქ 900-მდე ადამიანი იკვებებოდა, სასადილოთი მოსარგებლე ოჯახებს საკვების მარაგს სახლში მიუტანს. ამის შესახებ მუნიციპალური სასადილოს ხელმძღვანელმა, ასლან გელაძემ უთხრა „ბათუმელებს“. ამ პერიოდში უფასო სასადილოთი მოსარგებლე პირები რძისა და ხორცის პროდუქტებს ვერ მიიღებენ.
საკვებს ამ ოჯახებს სულადობის შესაბამისად გადასცემენ.
„ძირითადად არამალფუჭებადი პროდუქტები შევიტანეთ კალათაში, თევზსა და ხორცს ვერ მივუტანდით. ხორცეულიდან მხოლოდ ქათამი მივუტანეთ.
ერთ სულზე პაკეტში შედის: კარტოფილი -5 კგ, ხახვი – 2 კგ, შაქარი, ბურღული, ტომატი, ზეთი, კვერცხი – 6 ცალი. ამავე დროს გავეცით პასკა და 6 ცალი სააღდგომო კვერცხი“, – ამბობს ასლან გელაძე.
საკვების მარაგი სოციალურად დაუცველებმა 1-ელი აპრილიდან 21 აპრილამდე, საგანგებო მდგომარეობის დასრულებამდე უნდა იკმარონ.
„ადამიანების 99-მა პროცენტმა თქვა, რომ მიიღებს პროდუქტებს, 4 ადამიანია, ვისაც სურს, რომ გამზადებული საკვები წაიღოს. ამ ადამიანებისთვის ერთი სასადილო იმუშავებს და საჭმელს სახლებში მიაწვდის“, – ამბობს გელაძე.
მისი თქმით, ის პირები, ვისაც საჭმელი მიაქვთ ოჯახებში, საგანგებო მდგომარეობის დროს დაწესებულ მოთხოვნებს იცავენ.
„საკვებს სპეციალური კონტეინერებით მივუტანთ. ადგილზეც ვამუშავებთ ამ კონტეინერებს. თუ მას მოაქვს თავისი ჭურჭელი, იმასაც ადგილზე ვამუშავებთ სასადილოებში. ვინც ოჯახებში მიდის, იმ პერსონალს ექნება დამცავი პირბადე, სპეციალური სათვალეები და ხელთათმანები“, – ამბობს ასლან გელაძე.
