შინაგან საქმეთა სამინისტროს ინფორმაციით, მაღალი ეპიდემიოლოგიური რისკის გამო, პირთა გადაადგილების კონტროლისა და მოქალაქეთა ჯანმრთელობის მდგომარეობის შემოწმების მიზნით, თბილისის, ბათუმის, ქუთაისის, რუსთავის, ზუგდიდის, ფოთისა და გორის შესასვლელებში საკონტროლო გამშვები პუნქტები მოეწყო.
ბათუმის შემოსასვლელი / ფრიდონ ხალვაშის გამზირი / 31.03.2020 / ფოტო: ცაგო კახაბერიძე
„შინაგან საქმეთა სამინისტროს შესაბამისი დანაყოფების თანამშრომლები, თავდაცვის ძალებთან ერთად, საკონტროლო პუნქტების მეშვეობით, აღნიშნული ქალაქების ადმინისტრაციულ საზღვრებზე პირთა გადაადგილებას და საგანგებო მდგომარეობის გამკაცრებული პირობების შესრულებას აკონტროლებენ.
ასევე, ადგილზე ხდება მოქალაქეთა პირველადი თერმოსკრინინგი.
შინაგან საქმეთა სამინისტროს თანამშრომლები ადგილობრივ მოსახლეობას რეგულარულად, დეტალურად აუხსნიან საკარანტინო შეზღუდვებს და საჭიროების შემთხვევაში მაქსიმალურად დაეხმარებიან.
შეგახსენებთ, რომ საქართველოს ტერიტორიაზე მყოფი ყველა პირი ვალდებულია, დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს“ – აცხადებს შსს.
საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას – ფიზიკური პირის დაჯარიმებას 3 000 ლარით, ხოლო იურიდიული პირის – 15 000 ლარით. განმეორებით საგანგებო მდგომარეობის რეჟიმის დარღვევა წარმოადგენს სისხლის სამართლის დანაშაულს და ითვალისწინებს 3 წლამდე ვადით თავისუფლების აღკვეთას.
31 მარტის დილის 9 საათის მონაცემებით, საქართველოში კორონავირუსის დადასტურებული შემთხვევაა – 103, მათ შორის გამოჯანმრთელებულია – 20, კარანტინის რეჟიმში იმყოფება – 5114 და სტაციონარში მეთვალყურეობის ქვეშ რჩება 263 ადამიანი.
—
პრემიერ-მინისტრმა გიორგი გახარიამ 30 მარტს ქვეყანაში ფაქტობრივი საყოველთაო კარანტინი და კომენდანტის საათი გამოაცხადა, რომელიც 31 მარტის დილის 8 საათიდან ამოქმედდა:
რა იკრძალება 31 მარტიდან საქართველოში – კარანტინი და კომენდანტის საათი
