პრემიერ-მინისტრმა გიორგი გახარიამ დღეს, 30 მარტს, ქვეყანაში ფაქტობრივი საყოველთაო კარანტინი და კომენდანტის საათი გამოაცხადა. პრემიერის განცხადებით, ხვალ, 31 მარტს, ძალაში შედის შემდეგი აკრძალვები:
- სრულიად იკრძალება ნებისმიერი საზოგადოებრივი ტრანსპორტით, მათ შორის მეტროთი გადაადგილება, როგორც ქალაქებსა და მუნიციპალიტეტებში, ასევე, ქალაქებს შორის.
- დასაშვებია მხოლოდ მსუბუქი ავტომობილებით, მათ შორის, ტაქსით მგზავრობა მხოლოდ იმ შემთხვევაში, თუ გათვალისწინებული იქნება ჯანდაცვის სამინისტროს რეკომენდაცია და ავტომობილში იქნება სამი ადამიანი და მხოლოდ ორი ადამიანი იქნება უკანა სავარძელზე.
- მგზავრთა გადაყვანა დასაშვებია მხოლოდ სტრატეგიული ობიექტების თანამშრომლებისთვის, მხოლოდ ორგანიზებული და უსაფრთხო გადაყვანის მიზნით.
- იკრძალება სამზე მეტი პირის თავშეყრა, გარდა სასურსათო მაღაზიებისა და აფთიაქებისა, სადაც დაცული უნდა იყოს 2 მეტრის დისტანცია.
- აკრძალულია 70 წელს გადაცილებული მოქალაქეების სახლიდან გასვლა, გარდა იმ შემთხვევებისა, როცა ისინი მიდიან უახლოეს სასურსათო მაღაზიაში, უახლოეს აფთიაქში, ან უახლოეს სამედიცინო დაწესებულებაში. იმ შემთხვევაში, თუ 70 წელს გადაცილებული მოქალაქეები არიან მარტოხელები, მათ ვალდებულია დაეხმაროს ეკონომიკის სამინისტრო, ჯანდაცვის სამინისტრო და ადგილობრივი მუნიციპალიტეტები.
- ცხადდება კომენდანტის საათი 31 მარტიდან 21 აპრილამდე და 21 საათიდან იკრძალება როგორც ქვეითად, ისე ტრანსპორტით გადაადგილება ქალაქებში და ქვეყნის მასშტაბით დილის 6 საათამდე.
- პირთა გადაადგილების კონტროლისა და მათი ჯანმრთელობის მდგომარეობის შემოწმების მიზნით, პირთა გადაადგილების კონტროლის და საგანგებო მდგომარეობის გამკაცრებული პირობების და ამ პირობების შესრულების მიზნით, ასევე პირველადი თერმოსკრინინგის მიზნით მოეწყობა საკონტროლო პუნქტები შემდეგ ქალაქებში: თბილისში, ბათუმში, ქუთაისში, რუსთავში, ფოთში, ზუგდიდსა და გორში. ამ ქალაქების ადმინისტრაციული საზღვრების კონტროლის მიზნით, ღონისძიებას განახორციელებს შს სამინისტრო და ჩართული იქნებიან თავდაცვის სამინისტროს შესაბამისი უწყებები.
- ნებისმიერ მოქალაქეს ნებისმიერ დროს, ქალაქში გადაადგილებისას, უნდა ჰქონდეს პირადობის დამადასტურებელი დოკუმენტი.
