ბათუმის ინფექციურ საავადმყოფოში ოთხი ადამიანი გადაიყვანეს საკარანტინო ზონიდან კორონავირუსის საეჭვო სიმპტომებით. ოთხივე მათგანს ანალიზი უკვე აუღეს და პასუხი, აქვთ თუ არა მათ კორონავირუსი, დღის ბოლოს გახდება ცნობილი.
24 მარტის მდგომარეობით, ბათუმის ინფექციურ საავადმყოფოში კორონავირუსის დადასტურებული დიაგნოზით 5 პაციენტს მკურნალობენ. ბათუმის ინფექციური საავადმყოფოს კლინიკური მენეჯერის, ექიმ-ინფექციონისტ დავით მურვანიძის განცხადებით, მათი მდგომარეობა დამაკმაყოფილებელია. ხუთიდან მხოლოდ ერთ მათგანს აღენიშნება ცხელება – 37,6 და სხვა ჩივილები არ აქვთ.
ბათუმში კორონავირუსის 3 ახალი შემთხვევა გუშინ დადასტურდა, მათგან ორი ბათუმის ინფექციურში რჩება, ერთი პაციენტი კი, რომელიც, აჭარის ჯანდაცვის სამინისტროს განცხადებით ჩრდილოეთ ევროპის ქვეყნიდან იყო და ბათუმში სასტუმრო “ჰილტონში” თვითიზოლაციაში იმყოფებოდა, 23 მარტს, გვიან ღამით, სპეცრეისით გადაიყვანეს იმ ქვეყანაში, რომლის მოქალაქეცაა პაციენტი.
საქართველოში ამ დროისთვის [24 მარტის 12:0 სთ.] კორონავირუსის დადასტურებული შემთხვევა – 66-ია, მათ შორის გამოჯანმრთელებულია – 8, კარანტინის რეჟიმში იმყოფება – 3 320, სტაციონარში მეთვალყურეობის ქვეშ კი – 235 ადამიანი.
ამავე თემაზე:
საიდან არიან პაციენტები, რომელთაც დღეს ბათუმში COVID-19 დაუდასტურდათ
