საქართველოს წითელი ჯვრის ორგანიზაციის გარდა, რომელსაც ჯანდაცვის სექტორთან ერთად მუშაობასა და ამავდროულად, უსაფრთხოების წესების დაცვაზე გადამზადებული მოხალისეები ჰყავს, დახმარება მთავრობას კიდევ რამდენიმე ორგანიზაციამ შესთავაზა.
ჯანდაცვის მინისტრის, ეკატერინე ტიკარაძის თქმით, ამ ორგანიზაციების მოხალისეებს გავლილი არ აქვთ შესაბამისი ინსტრუქტაჟი, ამიტომაც მათი გამოყენება ამ ეტაპზე სარისკო იქნება, თუმცა მინისტრმა დაადასტურა ინფრომაცია, რომ პროცესში შესაძლოა ჩაერთოს საქართველოს ფოსტა, თუმცა როგორ – ამ კითხვაზე მინისტრს ჯერ დაზუსტებული პასუხი არ აქვს.
მინისტრის ინფორმაციით „საქართველოს ფოსტის“ ჩართულობაზე დღეს, 18 მარტს, მათთან შეხვედრის შემდეგ მიიღებენ გადაწყვეტილებას:
„პირველ საათზე ჩვენ გვექნება დეტალური განხილვა და თუ როგორ მოხდება მათი ჩართვა და უკუკავშირი, თუ რა ფორმატში იმუშავებს საქართველოს ფოსტა ჩვენი დავალებით. პირველ რიგში, ვიზრუნებთ, რომ მათ მიიღონ შესაბამისი ინფორმაცია, როგორ უნდა იყოს მათი გადაადგილება უსაფრთხო, ხოლო ამის შემდეგ უკვე კონტროლირებადი იქნება ჩვენთვის, თუ რას გააკეთებენ, ისინი იქნებიან სპეციალურ რგოლებთან მიბმულები.“
სპეცრგოლები კი სავარაუდოდ იმოძრავებენ ქრონიკული დაავადებების მქონე და მარტოხელა მოხუცების დასახმარებლად:
„ჯანდაცვის სამინისტროს აქვს ბაზა, რომელიც მოიცავს ქრონიკული დაავადებების მქონე პაციენტების სიას. ასევე, იმ პენსიონერების სიას, რომლებიც იმყოფებიან რისკჯგუფში და არიან მარტოხელები,“ – განაცხადა მინისტრმა.
მოხალისეებზე პაატა იმნაძემაც ისაუბრა. მისი განმარტებით, დაავადებათა კონტროლის ცენტრი არ არის ის ინსტანცია, რომელიც მოხალისეობის ინსტიტუტს გამოიყენებს: „ჩვენ მოხალისეს ვერ გამოვიყენებთ ვერც ლაბორატორიაში და ვერც კონტაქტების მოძიებაში. ვერც მეთვალყურეობაში, ვერც მათ ტრენინგში მივიღებთ მონაწილეობას. უამრავი მასალა გვაქვს გავრცელებული ამ მიმრთულებით, ჩვენ მონაწილეობა მივიღეთ ტრენერების მომზადებაში“.
