“ბოტების ქარხანა” – აჭარის მთავრობის სახლზე ფლაერები გააკრეს

“ტროლები გაიფაქტნენ”, “ტროლი ბიძინა – ბოტი ქოცი”, “თორნიკე რიჟვაძე – ბიძინას პინგვინი” – ამ შინაარსის ტრანსპარანტებით მივიდნენ დღეს, 2 მარტს, აჭარის მთავრობის სახლის წინ არასამთავრობო ორგანიზაცია “ალტერნატივას” წევრები და საპროტესტო აქცია გამართეს.

“ეს პატარა ბოტები მოვუტანეთ თორნიკე რიჟვაძეს, ნიშნად იმისა, რომ ის არის ივანიშვილის პატარა ბოტი და დღეს ნაცვლად იმისა, რომ ფულს ხარჯავდნენ მოშიმშილე ბავშვების გამოსაკვებად, დღეს ისინი ხელფასს უხდიან ამ ბოტებს შავი პიარის გასაკეთებლად და ამით ებრძვიან თავისუფალ სიტყვას,” – თქვა აქციის მიზანზე საუბრისას “ალტერნატივას” წევრმა ხათუნა ბერიძემ.

“ალტერნატივას” აქცია აჭარის მთავრობის სახლის წინ

“ბოტების სააგენტო” – ამ შინაარსის ფლაერი აჭარის მთავრობის სახლის აბრაზეც გააკრეს, რომელიც მოგვიანებით დაცვამ ჩამოხია

25 თებერვალს, მაშინ, როცა აჭარის მთავრობის თავმჯდომარე თორნიკე რიჟვაძე ტელეკომპანია “იმედის” გადაცემა “სვოტ ანალიზში” იყო  მიწვეული, ჟურნალისტებს ფეისბუქჩატში აჭარის მთავრობის პრესსამსახურის თანამშრომელმა შემთხვევით შეტყობინება ჩაუგდო. შეტყობინების შინაარსის მიხედვით, პრესსამსახურის „ჩვენიანებს“ ტელეკომპანია „იმედის“ ეთერში თორნიკე რიჟვაძის ლაივზე „საბრძოლველად“ ანუ კომენტარების დასაწერად მობილიზებას სთხოვდა.

28 თებერვალს აჭარის მთავრობის თავმჯდომარემ, თორნიკე რიჟვაძემ ფაქტზე კომენტარი გააკეთა და თქვა, რომ „მხარდამჭერების მობილიზება არის მნიშვნელოვანი, რომ ჩვენ ვებრძოლოთ დეზინფორმაციას, ვებრძოლოთ ნაცბოტებს და ნაცტროლებს. არავის მივცემთ საშუალებას, ამ ბოტებით და ტროლებით შემოგვიტიოს”.

ლაიქების ომი და მობილიზაციის დროს დაშვებული შეცდომები მთავრობაში