ქობულეთში აღმაშენებლის ქუჩა ადგილობრივმა მოსახლეობამ რამდენიმე წუთით გადაკეტა. ისინი აღმაშენებლის 546-ში მცხოვრები ცეცხლაძეების ოჯახის გამოსახლებას აპროტესტებენ. ადგილზე მობილიზებულია პოლიცია.
„ისევ შეხლა-შემოხლაა. ქუჩის გადაკეტვა მას შემდეგ შეწყდა, როცა აქ ქობულეთის მაჟორიტარი დეპუტატი პარლამენტში კობა ნაკაიძე მოვიდა. მევახშეს, ვისი ვალიც აქვს ოჯახს, შეხვედრა არ სურს. ოჯახი ითხოვს ვალის გადავადებას,“ – გვითხრა ორგანიზაციის „ჩვენი უფლებებისთვის“ ხელმძღვანელმა, თამაზ ბაკურიძემ.
თამაზ ბაკურიძის თქმით, ცეცხლაძეების ოჯახმა სესხი – 40 ათასი ამერიკული დოლარი კერძო მევახშისგან აიღო და ამ დროისთვის 150 ათასი დოლარის დაბრუნებას სთხოვენ. თამაზ ბაკურიძე ამბობს, რომ მევახშემ სახლი აუქიონზე გაყიდა. ამ სახლიდან გამოსახლების პროცესი კი, რამდენჯერმე გადაიდო.
„მე ადრეც ვცადე მოლაპარაკება, შევუთანხმდით კიდეც იმ პირს, ვისი ვალიც ჰქონდა ოჯახს, მაგრამ ეს მოლაპარაკება ჩაიშალა… ახლა ისევ ვცდილობ მასთან შეხვედრას, მაგრამ ვერ ვუკავშირდები,“ – ამბობს კობა ნაკაიძე, ქობულეთის მაჟორიტარი დეპუტატი საქართველოს პარლამენტში.
აღსრულების პოლიციას ჯერ გამოსახლების პროცესი არ დაუწყია. ადგილზე არიან ქობულეთის მერიის ხელმძღვანელი პირებიც.
