ბათუმში მიუსაფარი ბავშვებისთვის „კრიზისული ცენტრი“ მოეწყობა


ბათუმში, ჭავჭავაძის ქუჩაზე, მიუსაფარი ბავშვებისთვის ე.წ. კრიზისული ცენტრი მოეწყობა. საუბარია ბავშვებზე, რომლებსაც ქუჩაში უწევთ ღამის გათენება სხვადასხვა მიზეზით, მათ შორის, ოჯახში ძალადობის გამო.

„ბავშვების მდგომარეობას მულტიდისციპლინარული ჯგუფი შეაფასებს. ამ ჯგუფში იმუშავებენ: ფსიქოლოგი, სოციალური მუშაკი და პედაგოგი. ეს ჯგუფი დააკავშირებს არასრულწლოვანს შესაბამის სახელმწიფო უწყებებთან, ასევე მიიღებს გადაწყვეტილებას, რამდენი დღით შეიძლება გაჩერდეს მოზარდი ცენტრში,“ – გვითხრა თიკო აბაშიძემ, ფონდ „იალქანის“ ხელმძღვანელმა. ამ ორგანიზაციას აჭარის მთავრობა უზუფრუქტის წესით, 10 წლის ვადით გადასცემს სახელმწიფო ფართობს ცენტრის მოსაწყობად. გადაწყვეტილება დღეს, 29 ნოემბერს, მთავრობის სხდომაზე გაახმოვანა თორნიკე რიჟვაძემ, აჭარის მთავრობის თავმჯდომარემ.

თიკო აბაშიძის განმარტებით, „კრიზისულ ცენტრს“ შესაბამისი ინფრასტრუქტურის მოწყობა სჭირდება, რაც დონორი ორგანიზაციების მხარდაჭერით გაკეთდება. ცენტრის დაფინანსების თანამონაწილე ასევე იქნება სახელმწიფო, რომელიც დაფინანსებას თავშესაფარზე იმ შემთხვევაში გასცემს, თუკი მას არასამთავრობო ორგანიზაცია მოაწყობს.

„ჩვენ ხუთი წელია ვითხოვდით ამას… ჩვენს ოფისში, რომელიც აქამდე ნაქირავები გვქონდა, არაერთხელ წაგვიყვანია ქუჩაში დარჩენილი ბავშვები. კრიზისულ ცენტრს ვერ ვხსნიდით, რადგან ფართობი არ გვქონდა,“ – ამბობს თიკო აბაშიძე.

„კრიზისულ ცენტრში“ ერთდროულად 10 მოზარდის მოთავსება იქნება შესაძლებელი. ფონდ „იალქანის“ ხელმძღვანელი ამბობს, რომ ცენტრი მოემსახურება იმ ბავშვებსაც, რომლებიც სოციალურად დაუცველ კატეგორიას მიეკუთვნებიან.

„ამ დროისთვის ბათუმში ასეთი  56 ბავშვია, თუმცა მონაცემი ყოველდღიურად იცვლება,“ – დასძენს  თიკო აბაშიძე.

მთავარი ფოტო: ბავშვები, რომლებიც ზაფხულში ქუჩაში ათევენ ღამეს. ფოტო „ბათუმელების“ არქივიდან

ნეტგაზეთის მასალების სხვა გამოცემებში გადაბეჭდვის წესი
ავტორი