გთავაზობთ ინტერვიუს იაპონიის ელჩთან საქართველოში, ტადაჰარუ უეჰარასთან, რომელსაც „ბათუმელები“ იმპორტ-ექსპორტზე, ვიზების გამარტივებაზე, პირდაპირი ავიარეისების დანიშვნასა და საქართველოში მიმდინარე პროცესებზე ესაუბრა.
- ბატონო ტადაჰარუ, საქართველოში ბევრი ადამიანი ოცნებობს იაპონიაში მოგზაურობაზე, თუმცა ეს ბევრ სირთულესთან არის დაკავშირებული. მუშაობთ თუ არა მიმოსვლის გამარტივებაზე, ვიზებისა და პირდაპირი ფრენების მიმართულებით?
რა თქმა უნდა, ტურიზმი ძალიან მნიშვნელოვანია, როგორც საქართველოსთვის, ასევე იაპონიისთვის და მე მსურს მოვიწვიო უფრო და უფრო მეტი იაპონელი ტურისტი საქართველოში. საქართველო ტურისტებს ბევრ რამეს სთავაზობს, იქნება ეს მშვენიერი ბუნება, მასპინძლობა, უგემრიელესი ღვინო თუ სამზარეულო. იაპონელ ადამიანებს უყვართ მსგავსი გამოცდილების მიღება, თუმცა აღსანიშნავია, რომ ეს ორმხრივი უნდა იყოს, მნიშვნელოვანია, ქართველებიც ეწვიონ იაპონიას. იაპონიას სურს მიიღოს უფრო მეტი ტურისტი, მათ შორის ქართველები.ასე რომ, პირდაპირი ფრენები ძალიან მნიშვნელოვანია. თუმცა, პირველ რიგში უნდა გავზარდოთ ჩვენს ქვეყნებს შორის მიმოსვლა, ტურისტების რაოდენობა ორივე მხარეს, და შემდეგ უკვე შეიძლება პირდაპირი რეისების შემოღება.
- ახლახან მმართველმა პარტიამ არ შეასრულა დაპირება პროპორციული საარჩევნო სისტემის შემოღების შესახებ, რასაც საპროტესტო აქციები მოჰყვა. რა საფრთხეს შეიცავს დაპირების შეუსრულებლობა?
პროპორციული საარჩევნო სისტემა ძალიან მნიშვნელოვანია საქართველოსთვის. არა მხოლოდ იაპონია, არამედ დიდი ბრიტანეთი, ევროპა და შეერთებული შტატები ძლიერად უჭერდა მხარს მომავალი არჩევნების პროპორციული წესით ჩატარებას საქართველოში. ძალიან სევდიანი და დასანანი იყო იმის ყურება, რომ პარლამენტმა ჩააგდო ეს საკონსტიტუციო ცვლილება. ძალიან მნიშვნელოვანია რომ ორივე მხარე – როგორც დემონსტრაციის მონაწილეები, ისე ხელისუფლება, ჩაებან კონსტრუქციულ დიალოგში და შეინარჩუნონ მშვიდობა, რათა არ დაზიანდეს დემოკრატიული პროცესი საქართველოში. მომავალი წლის არჩევნები არის ძალიან მნიშვნელოვანი გამოცდა დემოკრატიისთვის და იმედი გვაქვს, სიტუაცია დასტაბილურდება და ქვეყანა აჩვენებს დემოკრატიის საუკეთესო ხარისხს დანარჩენ მსოფლიოს.
- 2019 წლის იანვარ-სექტემბერში იაპონიიდან იმპორტმა 150,2 მილიონი აშშ დოლარი შეადგინა, ხოლო ექსპორტმა 9 მილიონი აშშ დოლარი. იმპორტი იზრდება, მაგრამ არსებობს თუ არა რესურსი საქართველოდან იაპონიაში ექსპორტის გასაზრდელად? იგივე ღვინის ექსპორტის გაზრდაზე რას ფიქრობთ?
საელჩოს როლია, რომ წაახალისოს ექსპორტი იაპონიიდან საქართველოში. ამავე დროს, მე ძალიან ვგულშემატკივრობ ქართულ სახელმწიფოს და ეკონომიკას, რათა გაიზარდოს ექსპორტი საქართველოდან იაპონიაში. კარგი იქნება თუ გავიაზრებთ, რომ იაპონიის ბაზარი ძალიან დიდი და განვითარებულია და გაჯერებულია სხვადასხვა ტიპის პროდუქტით. ასე რომ, არ არის მარტივი, ქართულმა ღვინომ დაიმკვიდროს ადგილი ამ ბაზარზე. ამიტომ, ყველაზე მნიშვნელოვანია პუნქტუალურობა ტრანსპორტირებისას, რადგან იაპონელ ხალხს, მომხმარებლებს, სურთ, მიიღონ ქართული ღვინო ზუსტად იმ დროს, როცა გათვლილია.
ასე რომ, მიწოდების დაგვიანებას სერიოზულად შეუძლია ბიზნესის დაზიანება. პუნქტუალურობა კონკურენტუნარიანობის ძალიან მნიშვნელოვანი კომპონენტია, რაც საქართველომ უნდა განავითაროს. სხვანაირად, ვერ შეხვალთ ამ ძლიერ განვითარებულ ბაზარზე. კიდევ ერთხელ, ქართული ღვინო და გემო ფანტასტიკურია, და ყველა იაპონელი ადამიანი ბედნიერი იქნება მისი დაგემოვნებით, ასე რომ, იმედი მაქვს, რომ ქართველი ექსპორტიორები გაიაზრებენ, რომ ტრანსპორტირებისას პუნქტუალურობა ძალიან მნიშვნელოვანია.
- იაპონიის მთავრობა და ხალხი საქართველოში სხვადასხვა პროექტს ახორციელებს. რატომ აკეთებს იაპონია ამას საქართველოსთვის და რა ანიჭებთ უპირატესობას?
ჩვენ ბევრ მხარდამჭერ პროგრამას ვახორციელებთ საქართველოში. საელჩომ დააფინანსა 170-ზე მეტი პროექტი ბოლო 20 წელიწადში, მაგალითად, პროექტები ადამიანების უსაფრთხოებაზე, რაც ფუნდამენტური მნიშვნელობისაა… ამჟამად ვმუშაობთ პროექტებზე განათლებისა და სოფლის მეურნეობის სფეროებში. ეს ხდება თვითგანვითარებისთვის, რადგანაც იაპონია, იაპონიის საელჩო და სხვა ორგანიზაციები მარადიულად ვერ დაეხმარება საქართველოს. ამ პროექტებმა ხელი უნდა შეუწყოს საქართველოს თვითგანვითარებას.
