„ინტერნეტი ყველა სოფელს“ – რატომ ვერ შეასრულა მთავრობამ წინასაარჩევნოდ გაცემული დაპირება


„ქსელის მშენებლობა ჯერ არ დაწყებულა, შესაბამისად, თუ თქვენ მიერ დასახელებულ  სოფლებში დაიწყო და შეჩერდა სამუშაოები, ეს იქნებოდა კერძო სექტორის მხრიდან განხორციელებული აქტივობები….“ – ეს საქართველოს ეკონომიკის სამინისტროს მიერ დაფუძნებული ააიპ „ოუფენ ნეტიდან“ მოგვწერეს კითხვაზე – დაიწყო თუ არა მთავრობამ 2016 წელს, წინასაარჩევნოდ გაცემული დაპირების – „ინტერნეტი ყველა სოფელს“ შესრულება და რატომ შეაჩერეს რამდენიმე სოფელში ინტერნეტის ქსელის სამუშაოები?

„ოუფენ ნეტში“ უპასუხოდ დატოვეს ჩვენი მორიგი შეკითხვა: „რის გამო ვერ დაიწყო ქსელის მშენებლობა?“ 

საყოველთაო ინტერნეტიზაციის შესახებ თავდაპირველად საზოგადოებას ბიძინა ივანიშვილი 2014 წელს დაჰპირდა. 2015 წელს ეკონომიკის სამინისტრომ ახალი ააიპი დააფუძნა – „ოუფენ ნეტი“. 2016 წელს კი საქართველოს მთავრობამ დადგენილებამ გამოსცა, რომლის მიხედვითაც ინტერნეტიზაციის პროცესი გაიწერა, თუმცა ქსელის მოწყობის სამუშაოები ამ დრომდე არ დაწყებულა. საუბარია სოფლებზე, სადაც კერძო ოპერატორები შესაბამის ქსელს არ აწყობენ იმ არგუმენტით, რომ იქ მოსახლეობის რაოდენობა მცირეა და ხარჯების გაღება ბიზნესს არ უღირს.

აჭარის რეგიონში რამდენ სოფელში აქვთ ინტერნეტთან წვდომა? – კონკრეტული მონაცემი მუნიციპალიტეტებში ვერ გვითხრეს. პრესცენტრების ინფორმაციით, ინტერნეტიზაციის პროცესს ეტაპობრივად კერძო კომპანიები ახორციელებენ. საუბარია უკაბელო ინტერნეტზე, რომლის საფასური თვეში საშუალოდ 30 ლარია [6 მეგაბიტი წამში]. მოსახლეობა ასევე იყენებს მობილურ ინტერნეტს, რომელიც ძვირია. მაღალმთიანი სოფლების დიდ ნაწილში პრობლემაა მობილურ ინტერნეტთან წვდომაც.

„ჩვენ წინასწარ ვიცით, რა დაგვიჯდება შესაბამისი სადგურის მოწყობა და ქსელის გამართვა. შემდეგ ვატარებთ მოსახლეობასთან გამოკითხვას. როცა დაახლოებით 20-მდე აბონენტი გროვდება, იქ ვიწყებთ სამუშაოებს. ხულოში, მაგალითად, 70 აბონენტი უკვე გვყავს, ორი თვის წინ დავიწყეთ მუშაობა…“ – გვითხრა კომპანია „ხულონეტის“ ხელმძღვანელმა, გიორგი ტიტვინიძემ. ეს კომპანია დაბა ხულოს ცენტრში კაბელით აწვდის აბონენტებს ინტერნეტს, მთიან სოფლებში – უკაბელოდ.

„ჩვენ ვსარგებლობთ რადიოტექნოლოგიით. შესაძლოა, ერთი ანძით რამდენიმე სოფელმა ისარგებლოს… კომპანია წყვეტს, რამდენად უღირს კონკრეტულ ადგილას ახალი სადგურის მოწყობა. ჩვენ აჭარის მაღალმთიანეთში უკვე დაახლოებით 150 აბონენტი გვყავს,“ – ამბობს კომპანია „უბიკომის“ წარმომადგენელი გია ქედელიძე.

ამ კომპანიების დაკვირვებით, მაღალმთიანეთში მცხოვრები ადამიანების დაახლოებით 50 პროცენტს აქვს წვდომა ინტერნეტთან.

მთავრობის მიერ 2015 წელს გავრცელებული სარეკლამო მასალა

მთავრობის დაპირების მიხედვით, 500-მდე სოფელში უნდა მისულიყო ინტერნეტის ქსელი, მათ შორის, აჭარის 43 სოფელში და მოსახლეობის 90%-ზე მეტს უნდა ჰქონოდა ინტერნეტზე წვდომა. ეს სამუშაოები 150 მილიონი დოლარი დაჯდებოდა და მას ფონდი „ქართუ“ დააფინანსებდა. სახელმწიფო პროგრამის მიხედვით, აშენებული მაგისტრალი კერძო პროვაიდერზე უნდა გაქირავებულიყო. „ოუფენ ნეტის“ ინფორმაციით, პროგრამის ფარგლებში შექმნილი ქსელის სატელეკომუნიკაციო ოპერატორებზე მიქირავება ხარჯზე ორიენტირებული ტარიფით მოხდებოდა. რაც შეეხება ინტერნეტის საფასურს, ამ საკითხში „ოფენ ნეტი“ გეგმის მიხედვით არ ერეოდა და სამომხმარებლო ტარიფს პროვაიდერები განსაზღვრავდნენ.

რატომ ღირს ინტერნეტი სოფლად 30 ლარი? – კითხვის პასუხად კერძო ოპერატორები ამბობენ, რომ კონკურენცია არსებობს, ბაზარზე რამდენიმე პროვაიდერია და კონკურენტების ფასით არც ინტერესდებიან, თუმცა ამ დრომდე მომხმარებელს ფასის კუთხით არჩევანი არ აქვს.

„კონკურენცია მაინც არის. ერთსა და იმავე სოფელში შესაძლოა ერთი აბონენტი ჩვენგან იღებდეს ინტერნეტს, მეორე – სხვა კომპანიისგან,“ – უთხრა „ბათუმელებს“ გიორგი ტიტვინიძემ, „ხულონეტის“ ხელმძღვანელმა.

„ოუფენ ნეტს“ ქსელის მოწყობა არ დაუწყია, თუმცა ეკონომიკის სამინისტროს „ინოვაციებისა და ტექნოლოგიების სააგენტომ“ მსოფლიო ბანკის მხარდაჭერით აამოქმედა ახალი პროგრამა „ინტერნეტი ყველასთვის“. ამ პროგრამის ფარგლებში ინტერნეტის ქსელში უფასოდ რთავენ იმ ოჯახებს, რომელთა სარეიტინგო ქულა სოციალურად დაუცველთა მონაცემთა ბაზაში 100 ათასზე დაბალია. ამ აბონენტებს ასევე ექნებათ შეღავათი ინტერნეტის ტარიფებზე.

„მათ გამართეს პრეზენტაცია ქედის კულტურის სახლში 21 სექტმებერს, შემდეგ რამდენმა სოციალურად დაუცველმა გამოთქვა სურვილი, მონაცემები ჩვენ არ გვაქვს,“ – გვითხრეს ქედის მერიის პრესცენტრში.

რა ინფორმაცია აქვთ აჭარის მთავრობაში დაპირებულ ინტერნეტიზაციაზე? – ვკითხეთ აჭარის მთავრობის პრესცენტრს, თუმცა ამ დრომდე პასუხი არ მიგვიღია.

____________________________

მთავარი ფოტო: უკაბელო ინტერნეტის რეკლამა სოფელ ყინჩაურში, მანანა ქველიაშვილი /„ბათუმელები“

ნეტგაზეთის მასალების სხვა გამოცემებში გადაბეჭდვის წესი
ავტორი