Batumelebi | ეროვნულმა ბანკმა 100 წლის საიუბილეოდ ვერცხლის 5-ლარიანი საკოლექციო მონეტა გამოუშვა ეროვნულმა ბანკმა 100 წლის საიუბილეოდ ვერცხლის 5-ლარიანი საკოლექციო მონეტა გამოუშვა – Batumelebi
RU | GE  

ეროვნულმა ბანკმა 100 წლის საიუბილეოდ ვერცხლის 5-ლარიანი საკოლექციო მონეტა გამოუშვა

საქართველოს ეროვნული ბანკის ინფორმაციით, ბანკი 100 წლის იუბილეს აღნიშნავს, საიუბილეო თარიღის აღსანიშნავად კი 5 ლარის ნომინალის ვერცხლის საკოლექციო მონეტა გამოუშვა. მონეტა ლიეტუვას ზარაფხანაში მოიჭრა და მისი სარეალიზაციო ფასი 75 ლარია. სულ მოიჭრა 1500 ცალი მონეტა. მონეტის წონა 15,5 გრამია.

საკოლექციო მონეტა/ფოტო: სები / „მონეტის ავერსის მთავარ კომპოზიციას წარმოადგენს საქართველოს ეროვნული ბანკის ლოგო და შენობის სტილიზებული გამოსახულება, რომელშიც დღესდღეობით განთავსებულია საქართველოს ეროვნული ბანკი. ასევე, დატანილია წარწერები: “საქართველოს ეროვნული ბანკი” და “5 ლ”. მონეტა გაფორმებულია სვაროვსკის კრისტალით.
მონეტის რევერსის მთავარ კომპოზიციას წარმოადგენს შენობა, რომელშიც 1919 წელს დაფუძნდა და ფუნქციონირებდა საქართველოს პირველი სახელმწიფო ბანკი (დღევანდელი საჯარო ბიბლიოთეკის პირველი კორპუსი). მონეტაზე დატანილია წარწერები: “5 ლარი”, “საქართველო”,   “1919 . 2019” ,  “Georgia”.“

„მთელი წლის განმავლობაში იმართებოდა იუბილესადმი მიძღვნილი სხვადასხვა ღონისძიება – საჯარო ლექციები, კონკურსები, გამოფენები და სხვა. საქართველოს ეროვნულ ბანკს 100 წლის იუბილე პარტნიორმა ორგანიზაციებმაც მიულოცეს… საიუბილეო თარიღთან დაკავშირებით 1 ოქტომბერს ღონისძიება ეროვნული ბანკის ისტორიულ შენობაში – საჯარო ბიბლიოთეკაში გაიმართა,“ – აღნიშნულია ეროვნული ბანკის მიერ გავრცელებულ ინფორმაციაში.

საქართველოს ეროვნული ბანკი დღეს თბილისში, იუსტიციის სახლის შენობაშია განთავსებული. აღნიშნულ შენობაში სასადილოს მოსაწყობად ბანკმა ტენდერი გამოაცხადა, სადაც სატენდერო თანხა 865 ათასი ლარია.

საქართველოს ეროვნული ბანკის ახალი სათავო ოფისი კი თბილისში, მტკვრის სანაპიროსთან, ცირკის მიმდებარე ტერიტორიაზე უნდა აშენდეს.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com