წერილი საქართველოს პრემიერ მამუკა ბახტაძეს მუსლიმი ქართველისგან


ავტორი: იოსებ აბაშიძე

ბატონო მამუკა, ჩვენთვის მთავრობაში ანუ თქვენამდე მოღწევა ძნელია, ამიტომ ჩვენს ტრადიციულ დღესასწაულს [შუამთობა] ვიყენებთ თქვენთვის რაღაც ცნობების მოსაწოდებლად, მაგალითად, იმაზე, რომ გზა არ გვაქვს.

წლევანდელ დღესასწაულზე მეხუთედ მომიხდა თქვენთან, ანუ პრემიერთან შეხვედრა და თქვენგან მოვისმინეთ – „კი, ბატონო – კი, ბატონო“. იცით რა, მოდი თქვენ იყავით ბატონი, მაგრამ არა ისეთი, რომელიც ყმებს თავის ქონებად თვლის და ჩვენ გზა გაგვიკეთეთ.

ახლა კი სხვა რამე – გიცხადებთ, რომ ბათუმში მეჩეთის მშენებლობის პროექტი მერიამ გადააფურთხა. თუმცა დაზუსტებით არ ვიცი, ეს მთავრობამ გააკეთა თუ მერიამ.

უპირველეს ყოვლისა, დიდ მადლობას მოგახსენებთ ჩვენ მიმართ გაწეული „იმ დიდი ღვაწლისთვის“, რომელიც თქვენ [მარტო მამუკა ბახტაძეს არ ვგულისხმობ] გამოიჩინეთ ჩვენ მიმართ – ვგულისხმობ ახალი მეჩეთის მშენებლობის საკითხს. ჩვენ ვყოფილვართ უვიცები, რომ ამ საკითხებზე კანცელარიები ავავსეთ წერილებით, რაც მაკულატურად იქცა. არ გვცოდნია, რამდენად „განვითარებულ და ცივილიზებულ“ ინტელიგენციასთან გვქონია საქმე. ასევე მთავრობასთან, რომელიც სახელმწიფო მანქანით მართავს რელიგიას, რელიგიური ლიდერების მოვალეობას ასრულებს და თავისი სურვილით ანიჭებს რელიგიას პრივილეგიებს. სხვებს კი ზღუდავს, დისკრიმინაციაში, უუფლებობაში ტოვებს და თავისას [ვგულისხმობ მართლმადიდებლობას] მაღალ კომფორტს უქმნის.

ამით ჩვენ გვარწმუნებთ, რომ თქვენ „რელიგიურები“ ხართ, მაგრამ უსამართლოები – რელიგიურობა არ ითვალისწინებს სხვათა ჩაგვრას.

სამწუხაროდ, თქვენ არ გჯერათ თქვენი რელიგიის მდგრადობის და ათასი მაქინაციითა თუ სახელმწიფო მანქანით ცდილობთ მის მდგრადობას ჩვენს ხარჯზე: მინარეთი მოჭერით, რელიგიურ ნაგებობაზე ღორის თავი მიგვიჭედეთ, ბათუმის მეჩეთის პროექტი გადააფურთხეთ და კიდევ რამდენი რამ არის, რითაც მართლმადიდებლობის ავტორიტეტის ამაღლება გინდათ.

ამასობაში ჩადიხართ ორ ცოდვას – ჩვენ დისკრიმინაციაში გვამყოფებთ და მართლმადიდებლობას უძლურად, უნიათოდ გამოსახავთ. სამაგიეროდ, როგორც კოსმოსი აღემატება ადამიანთა მოდგმას, საქართველოში მართლმადიდებელი ეკლესიის უძრავი და მოძრავი ქონება ისე აღემატება სხვებისას. ეს საიდუმლო არ არის და მედიით ბევრჯერ ითქვა ამის შესახებ.

ამ ყველაფერს კი იყენებთ ჩვენ წინააღმდეგ.

დაიმახსოვრეთ, რელიგია ძალადობა არ არის. რელიგიას თავად უნდა ჰქონდეს მყარი იდეოლოგია, რასაც თქვენ ვერ იაზრებთ.

რამდენ ხანს უნდა გვაწვალოთ. თქვენ გამოდიხართ დიდ ფორუმებზე და აცხადებთ, რომ საქართველოში ყველაფერი კარგად არის. ყველას უფლება დაცულია. ამ შემთხვევაში შეიძლება თქვენსა და ზოგიერთის უფლებას გულისხმობთ. მაგრამ თქვენ თქვენი ამ განცხადებით გამორიცხავთ საქართველოში ჩვენს არსებობას. თუ ასე გინდათ განაცხადეთ, მაგრამ იცოდეთ, რომ აგროვებთ დაძაბულობას – გროვდება ენერგია, რომელიც პოტენციურად იფეთქებს. ამის პროგნოზს უკვე არსებული პრეცედენტები იძლევა უახლესი წარსულიდან. თუმცა თქვენ დაზღვეულები ხართ – შინაგან საქმეთა სამინისტროს ტყვიები ბლომად ექნება.

არაუშავს, ჩვენ მაინც ვიბრძოლებთ ჩვენი კონსტიტუციური უფლების დასაცავად. ჩვენ მივაღწევთ ჩვენსას. თუმცა ცოდვილნი იქნებიან ბოროტნი მმართველნი, რომლებიც თავს დებენ მართლმადიდებლობაზე, მაგრამ მათ მმართველობაში სიმართლე არ არსებობს.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.