„ოცნების ქალაქში“ ქოხების მეპატრონეებს სამთავრობო კომისია აფრთხილებს


„ოცნების ქალაქში“ სამთავრობო კომისიამ იმ ქოხების მეპატრონეები გააფრთხილა, რომლებიც კომისიაში დასარეგისტრირებლად არ გამოცხადდნენ. სპეციალური განცხადებები ქოხებზე გამოაკრეს და მათ დასარეგისტრირებლად ვადა პირველ სექტემბრამდე მისცეს. კომისიის ინფორმაციით, ასეთი სულ 70 ქოხია.

კომისიის თავმჯდომარის, რამაზ ჯინჭარაძის ინფორმაციით, კომისია ოჯახების დარეგისტრირებას პირველ სექტემბერს დაასრულებს. შემდეგ კი დაიწყება იმის შემოწმება, ფლობს თუ არა რომელიმე ოჯახი ალტერნატიულ საცხოვრებელს.

ამ დროის მონაცემებით, კომისიამ 1594-მდე ოჯახი დაარეგისტრირა.

აჭარის მთავრობა „ოცნების ქალაქში“ მცხოვრებლებისთვის ბინების მშენებლობას გეგმავს. პროექტს, რომლის მიხედვითაც „ოცნების ქალაქში“ საცხოვრებელი კორპუსები უნდა აშენდეს, უკვე მზადაა.

ე.წ. „ოცნების ქალაქი“ ბათუმთან ახლოს, ხელვაჩაურში, ყოფილი სამხედრო ბატალიონის ტერიტორიაზე 2012 წელს, საპარლამენტო არჩევნების შემდეგ გაჩნდა. ყოფილი 25-ე და 53-ე სამხედრო ბატალიონების ბაზების ტერიტორიაზე ოჯახებმა, რომელთა ნაწილი აცხადებდა, რომ ეკომიგრანტები იყვნენ ან არ გააჩნდათ საცხოვრებელი, ხის ფიცრულები ააგეს და დასახლდნენ, თუმცა, თანდათან ხის ნაგებობებს კაპიტალური შენობები ჩაენაცვლა.

ტერიტორია, სადაც „ოცნების ქალაქია“ გაშენებული, აჭარის ავტონომიური რესპუბლიკის საკუთრებაა.

„ოცნების ქალაქში“ მცხოვრები ოჯახების რეგისტრაცია 2019 წლის 9 თებერვალს დაიწყო.

ოცნების ქალაქი

ნეტგაზეთის მასალების სხვა გამოცემებში გადაბეჭდვის წესი
ავტორი