აჭარის საავტომობილო გზების დეპარტამენტის უფროსად მუხრან კაკაბაძე დანიშნეს. ახალი ხელმძღვანელი თანამშრომლებს აჭარის ფინანსთა და ეკონომიკის მინისტრმა ჯაბა ფუტკარაძემ წარუდგინა.
მუხრან კაკაბაძე პროფესიით იურისტია. ის 2018 წლიდან დღემდე საქართველოს გარემოს დაცვისა და სოფლის მეურნეობის სამინისტროს, გარემოსდაცვითი ზედამხედველობის დეპარტამენტის აჭარისა და გურიის რეგიონული სამმართველოს უფროსის პოზიციაზე მუშაობდა.
მუხრან კაკაბაძე სხვადასხვა წლებში ბათუმის მერიის იურიდიულ სამსახურში, აჭარის უმაღლეს საარჩევნო კომისიაში, აჭარის პროფესიულ კავშირში და კერძო სექტორში იურისტად მუშაობდა, ასევე ეწეოდა საადვოკატო საქმიანობას.
მას შემდეგ, რაც დეპარტამენტის უფროსის თანამდებობა არჩილ ჩიქოვანმა დატოვა და ის აჭარის მთავრობის აპარატის უფროსად დანიშნეს, დეპარტამენტის უფროსის მოვალეობას მისი მოადგილე რაულ ბერიძე ასრულებდა. შესაბამისად, ეს პოზიცია ერთი წლის განმავლობაში ვაკანტური იყო. როგორც აჭარის ფინანასთა და ეკონომიკის სამინისტროს პრესსამსახურში გვითხრეს, რაულ ბერიძე მოადგილის თანამდებობაზე რჩება.
