საზოგადოებრივი მაუწყებლის აჭარის ტელევიზია და რადიო მრჩეველთა საბჭოს რიგგარეშე სხდომას იწვევს, რათა მრჩეველთა საბჭოს წევრთა ჰონორარის ოდენობის საკითხი განიხილოს.
მაუწყებლის მრჩეველთა საბჭომ ეს საკითხი რამდენიმე დღის წინ განიხილა და ხმათა უმრავლესობით საბჭოს წევრებისა და საბჭოს აპარატის წევრების ხელფასები გაიზარდა. კერძოდ, მაუწყებლის მრჩეველთა საბჭოს თავმჯდომარის ჰონორარი თვეში 3 300 ლარით განისაზღვრა, თავმჯდომარის მოადგილის – თვეში 3 100 ლარით, ხოლო წევრების – თვეში 3 025 ლარით.
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოში ხუთი წევრია: ნატა იმედაიშვილი [თავმჯდომარე], გიორგი ირემაძე, ბეჟან გობაძე, გიგა ჩხარტიშვილი და ირაკლი დარცმელიძე. ნატა იმედაიშვილის განცხადებით, მას ხელფასების გაზრდისთვის მხარი არ დაუჭერია და აღნიშნული საკითხი საბჭოს წევრმა გიგა ჩხარტიშვილმა დააყენა, რომელსაც მხარი დაუჭირეს ირაკლი დარცმელიძემ და ბეჟან გობაძემ. მან ასევე განაცხადა, რომ საბჭოს წევრები გეგმავენ ხელფასების გაზრდის საკითხის გადახედვას და საბჭოს დანარჩენ წევრებს მოუწოდეს, მათ მიერ მხარდაჭერილი გადაწყვეტილება შეცვალონ.
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს 2019 წლის ბიუჯეტი 267 915 ლარია.
_________
ფოტოზე: აჭარის საზოგადოებრივი მაუწყებლის მრჩეველთა საბჭო
