ქობულეთში, პლაჟის გასწვრივ მდებარე მიწის ნაკვეთს, რომელსაც აჭარის ფინანსთა და ეკონომიკის სამინისტრო პირობებიან აუქციონზე თავიდან 4 მილიონ 585 ათას ლარად ყიდდა, ამჯერად 1 146 250 ლარად ყიდის. ფიჭვნარში მდებარე ეს ნაკვეთი სამინისტრომ აუქციონზე უკვე მეხუთედ გამოიტანა, ამჯერად 75%-იანი ფასდაკლებით.
აუქციონის მთავარი პირობაა ამ ნაკვეთზე მრავალფუნქციური შენობა-ნაგებობის აშენება, რომელიც უნდა შეიცავდეს არანაკლებ 100-ნომრიან სასტუმროს, სპორტულ-გამაჯანსაღებელ, სარეაბილიტაციო და საბავშვო ცენტრებს, რესტორანს, არანაკლებ 60 ავტომანქანაზე გათვლილ ავტოსადგომს, სკვერს. მიწის ნაკვეთის მყიდველმა აქ არანაკლებ 50 მილიონი ლარის ინვესტიცია უნდა განახორციელოს.
„ორი [მაღალი და დაბალი] საბაზრო შეფასება გვაქვს… იმ მეორე, დაბალ საბაზრო შეფასებამდე შეგვიძლია ჩამოვიდეთ, მაგრამ იმის ქვევით არა“, – განაცხადა „ბათუმელებთან“ აჭარის ფინანსთა და ეკონომიკის მინისტრის მოადგილემ, თორნიკე კუჭავამ დაახლოებით თვენახევრის წინ.
„ბათუმელები“ მაშინ დაინტერესდა, თუ რამდენი იყო ეს დაბალი ფასი. მინისტრის მოადგილემ გვითხრა, რომ „მაღალი ფასი დაბალზე დაახლოებით ოთხჯერ მეტი იყო“. ამ ინფორმაციის გათვალისწინებით მაშინ გამოვთვალეთ, რომ ეს დაბალი ფასი 1 146 250 ლარი იყო. ანუ, ზუსტად ის თანხა, რა თანხითაც გამოცხადდა აუქციონი, ამჯერად მეხუთედ.
თორნიკე კუჭავამ „ბათუმელებთან“ მაშინ ასევე განაცხადა, რომ პირდაპირი მიყიდვა ან 1 ლარად ამ ნაკვეთის გასხვისების საკითხი სამინისტროში არ განიხილება: „ქონება გასხვისდება მხოლოდ აუქციონით, რომელმაც უნდა გამოაჩინოს, არის თუ არა დაინტერესებული პირი, ანუ უღირს თუ არა პირს, ბიზნესს, გადაიხადოს მოცემული პირობებით, მოცემული ფასი“.
ამ თემაზე:
გასაყიდი მიწები აჭარის სანაპიროზე, სადაც შესაძლოა სასტუმროები აშენდეს
