„რამდენადაც ჩემთვის ცნობილია, ამ კვლევაში ნაკლებად ეყრდნობოდა პრაქტიკულ გეოლოგიურ და გეოდეზიურ კვლევებს, რისი გაკეთებაც ახლა არის კომპანიისთვის დავალებული. ასე რომ, გვაქვს 2013 წლის თეორიული ნაშრომი და, მეორე მხრივ, ჩვენ გვექნება პრაქტიკული კვლევები. ვფიქრობ, რომ ეს აბსოლუტურად სანდო იქნება,“ – გვიპასუხა ბათუმის მერმა ლაშა კომახიძემ გაეროს განვითარების პროგრამის მიერ მომზადებულ კვლევაზე, სადაც წერია, რომ ბათუმის კონცხზე მრავალსართულიანი შენობები არ უნდა აშენდეს. ბათუმის კონცხი ის ადგილია, სადაც ხუთი ცათამბჯენის აშენება იგეგმება და ამას ლაშა კომახიძე აქტიურად მხარს უჭერს.
ლაშა კომახიძე იყო გაეროს განვითარების პროგრამის კოორდინატორი აჭარაში, როცა კონკრეტულ საფრთხეებზე 2013 წელს გაეროს მხარდაჭერით კვლევა მომზადდა.
„დიდ საფრთხესთანაა დაკავშირებული ბათუმის კონცხის ტერიტორიაზე მრავალსართულიანი სახლების მშენებლობა, რომელთა დიდ სიმძიმეს შეიძლება ვერ გაუძლოს კონცხის ნაპირთან ახლოს მდებარე წყალქვეშა კანიონის სათავეებში მეწყრების ზეგავლენით დასუსტებულმა სანაპირო ზოლმა“, – აღნიშნულია UNDP-ის მიერ დაფინანსებულ კვლევაში.
ლაშა კომახიძე განმარტავს, რომ კომპანიამ, რომელიც ცათამბჯენების აშენებას ბათუმის კონცხზე გეგმავს, უნდა წარმოადგინოს კვალიფიციური კომპანიის მიერ დამუშავებული გეოდეზიური კვლევის შედეგი. ბათუმის მერის თქმით, მსგავს კვლევას ამჯერად ერთ-ერთი იტალიური კომპანია ამზადებს.
რის საფუძველზე უჭერს მხარს და ეთანხმება „რივიერას“ პროექტს ბათუმის მერი, როცა ახალი კვლევა არ არსებობს, წინა კვლევით კი, მრავალსართულიანი სახლები კონცხზე აღარ უნდა აშენდეს?
„თანხმობა, როგორც ასეთი, გრგ-ზე ჯერ არ არის. ჩემი ეს მზაობა არის უშუალოდ პროექტის მხარდაჭერაზე, თუმცა ამ პროექტს აქვს აუცილებელი შემადგენელი – გეოლოგიური და გეოდეზიური კვლევები. შესაძლოა პროექტი იყოს ეკონომიკურად მომგებიანი, მაგრამ ფიზიკურად გარკვეული გარემოებების გამო ვერ განხორციელდეს. იგივე სიტუაციაა აქ,“ – გვითხრა ლაშა კომახიძემ.
