საფრანგეთში ელისეს მინდვრებს მფრინავმა კაცმა გადაუფრინა


ფრანგმა ფრენკი ზაპატამ იარაღით ხელში ელისეს მინდვრებს გადაუფრინა საფრანგეთის ეროვნულ დღესასწაულზე – 14 ივლისს, ბასტილიის აღების დღეს. მფრინავი დაფა რთული კონსტრუქცია სულაც არ არის და ხუთი პატარა ძრავით ახერხებს ჰაერში აფრენას. აპარატით საათში 190 კმ – ის გადაფრენაა შესაძლებელი და მისი მართვისას მთავარი წონასწორობის შენარჩუნებაა.

საფრანგეთის თავდაცვის მინისტრმა, ფლორანს პარლიმ ჟურნალისტებთან განაცხადა, რომ მფრინავ დაფას ეტაპობრივად სხვადასხვა საჭიროების მიხედვით გამოიყენებენ, მათ შორის არმიის ჯარისკაცები.

გამოგონების ავტორი, ფრენკი ზაპატა, 40 წლისაა და ის  წყალზე მოთხილამურე მსოფლიო და ევროპის ჩემპიონია. პირველად მან წყლის ზედაპირზე მფრინავი დაფა გამოიგონა 2012 წელს. მოწყობილობა 10 000 – იანი ტირაჟით გაიყიდა მსოფლიოში.

სპორტსმენის მფრინავი დაფის გამოგონებით საფრანგეთის თავდაცვის სამინისტრო დაინტერესდა და 2018 წელს 1,3 მილიონი ევროს სუბსიდია გამოყო გამოგონების ტექნიკური სრულყოფისთვის. მფრინავი დაფა ბუშ-დიუ-რონში მდებარე კომპანია როუვი აწარმოებს და 100%-ით ფრანგული გამოგონებაა.

„კასკადიორი, პილოტი, კომპანიის შეფი, გამომგონებელი და სპორტსმენი, არ ვიცი ამათგან უფრო რომელი ვარ, ალბათ ცოტ-ცოტა ყველა და ამავე დროს არავინ“, – ამბობს გამომგონებელი ფრენკი ზაპატა მარსელის ყოველდღიურ გამოცემა Var-Matin-თან.

2020 წლისთვის ზაპატას მფრინავი დაფის გაუმჯობესებული მოდელიც გამოვა, რომლითაც ერთდროულად 2 ადამიანი შეძლებს გადაფრენას.

ფრენკი ზაპატა ამჯერად  გეგმავს გაიმეოროს ავიაციის პიონერის, ლუი ბლერიოს 110 წლის წინანდელი მარშრუტი და 25 ივლისს ის მფრინავი დაფით ლა მანშის სრუტეს გადაუფრენს.

წყარო: Libération

 

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან