საქართველოს პარლამენტში რუსეთის დუმის დეპუტატის, სერგეი გავრილოვის შესვლის შემდეგ, მოქალაქეთა პროტესტის ფონზე ქართული ოცნების სახელით კახი კალაძე საგანგებო განცხადებას აკეთებს:
„ქართული ოცნების“ სახელით მსურს გამოვეხმაურო აღმაშფოთებელ ფაქტს, რომელსაც დღეს ჰქონდა ადგილი საქართველოს პარლამენტში. რუსული დელეგაცია დატოვებს საქართველოს, ამ ფორმით კონფერენცია არ გაგრძელდება. ჩვენ 17 საუკუნეა მართლმადიდებელი სამყაროს წარმომადგენლები ვართ და ყველა პლატფორმას ვიყენებთ ქვეყნის დეოკუპაციისთვის. დაუშვებელი იყო რუსი დელეგატის სპიკერობით ფორუმის ჩატარება. ჩვენ უნდა ვებრძოლოთ და ვებრძვით ჩვენი ქვეყნის ოკუპაციას ყოველდღე, ვიბრძვით განათლებით, საქმით, ეკონომიკის განვითარებით. დღეს საზოგადოებაში და ჩვენს გუნდში კონსენსუსია მომხდართან დაკავშირებით, მტერს სიტუაციის სარგებლობის უფლება არ უნდა მივცეთ. მოხდა აღმაშფოთებელი შეცდომა, რომელმაც მთელ გუნდს დარტყმა მიაყენა, ამიტომ ორგანიზატორებს მოუწევთ განუმარტონ ქართულ საზოგადოებას, რა რატომ და როგორ მოხდა.
არც ჩემთვის, არც თანაგუნდელებისთვის არ იყო მისაღები ის ფორმა, რაც დღეს ვნახეთ. არავინ ვაპირებთ ,,გაპრავებას“ – კობახიძე საზღვარგარეთაა, როცა დაბრუნდება, განმარტავს ყველაფერს: ვის უნდა გაეხსნა სხდომა, ვის უნდა წაეყვანა და ასე შემდეგ, ისევე, როგორც განმარტავს ქუცნაშვილიც. როგორც განვითარდა მოვლენები, ეს ასე დაგეგმილი არ იყო“, – აცხადებს თბილისის მერი, კახა კალაძე.
შეგახსენებთ, რომ საქართველოს პარლამენტის შენობაში მართლმადიდებლობის საპარლამენტთაშორისო გენერალური ასამბლეის რიგით 26-ე სესია მიმდინარეობდა, სადაც რუსმა დეპუტატმა დაიკავა პარლამენტის თავმჯდომარის სავარძელი და სხდომას რუსულ ენაზე გაუძღვა.
რუსეთის დელეგაცია, დუმის დეპუტატ სერგეი გავრილოვის ხელმძღვანელობით, საქართველოში მართლმადიდებლობის საპარლამენტთაშორისო ასამბლეის 26-ე სესიაზე დასასწრებად ჩამოვიდა. მართლმადიდებლობის საპარლამენტთაშორისო გენერალური ასამბლეის სესია თბილისში 19-22 ივნისს იმართება.
გავრილოვი აფხაზეთისა და ცხინვალის რეგიონის დამოუკიდებლობას აღიარებს. ოპოზიცია ასამბლეას ბოიკოტს უცხადებს. ოპოზიციის ინფორმაციით, გავრილოვი თავის დროზე აფხაზეთის ომშიც მონაწილეობდა თავად დეპუტატი ამ ცნობას უარყოფს.
