ბათუმის ცენტრში, ზღვასთან ახლოს, რუსთაველის ქუჩის გაგრძელებაზე, ე.წ. ლუჟკოვის სახლის ადგილზე, კომპანია „ალიანს სიტი“ ორმოცდაათსართულიანი ცათამბჯენის მშენებლობას გეგმავს. მერიის ინფორმაციით, დაგეგმილი მრავალფუნქციური კომპლექსის პროექტი სასტუმროს, აპარტამენტებს, საცურაო აუზებს, ლაუნჯებს, საოფისე ფართობებს, მაღაზიებს, რესტორნებს, სხვადასხვა სახის ტურისტულ და სპორტულ სივრცეს მოიცავს. საკრებულოსთვის უკვე გადაგზავნილი განკარგულების პროექტის განმარტებით ბარათში აღნიშნულია, რომ სამშენებლო პროექტი მიწისქვედა სართულზე ავტომანქანის 450 გასაჩერებელი ადგილის მოწყობას ითვალისწინებს.
სამშენებლო პროექტი მიწის ნაკვეთზე, რომელიც 18 000 კვადრატულ მეტრ ტერიტორიას მოიცავს, ზონის სტატუსის შეცვლას მოითხოვს: დაგეგმილი მასშტაბისა და ფუნქციის მქონე შენობის აგების ნებართვა რომ გაიცეს, საცხოვრებელ ზონას უნდა მიენიჭოს საზოგადოებრივ საქმიანი ზონის სტატუსი.
ამის სანაცვლოდ კომპანია საქართველოს 500 მოქალაქის დასაქმებასა და 250-მილიონიანი ინვესტიციის განხორციელებას ჰპირდება ბათუმის მერიას. მერიის ინფორმაციით, კომპანია მშენებლობის დაწყებას 2019 წელს, ხოლო მის დასრულებას 2023 წელს გეგმავს.
ახალ სამშენებლო პროექტთან დაკავშირებით განაშენიანების გეგმარებითი დავალების მისაცემად მერიას ადმინისტრაციული წარმოება ჰქონდა დაწყებული, ამჯერად კი საკრებულოში შევიდა ინიციატივა, გაიცეს გეგმარებითი დავალება, რაც ამ ტერიტორიაზე ზონის სტატუსის შეცვლასაც ითვალისწინებს.
2019 წლის დასაწყისში გახდა ცნობილი, რომ კომპანია „ალიანს სიტი“ „ლუჟკოვის სახლის“ დანგრევას და ახალი მშენებლობის წამოწყებას გეგმავდა.
კომპანია ალიანს სიტი „ლუჟკოვის სახლის“ დანგრევას და ახალი მშენებლობის წამოწყებას გეგმავს
![„ლუჟკოვის სახლის“ დემონტაჟი დაიწყო [ფოტო]](https://batumelebi.netgazeti.ge/wp-content/uploads/2019/06/qaver-1.jpg)
