დღეს, 27 თებერვალს, ბათუმის ზონალურმა საბჭომ ბაქოს ქუჩა #51-ში მდებარე მიწის ნაკვეთის მშრალი ტვირთის ტერმინალის სამშენებლოდ გამოყენება და სამშენებლო პროექტის შეთანხმება განიხილა.
საუბარია გრანულირებული კარბამიდის გადასატვირთ ტერმინალზე, რომლის აშენებასაც ბათუმის ნავსადგურში „ვონდერნეტ ექსპრეს ჯორჯია“ გეგმავს.
როგორც საბჭოს სხდომაზე ითქვა, ბათუმის ნავსადგურში მშრალი ტვირთის ტერმინალის მშენებლობის საკითხი განხილვის საკითხი გახდა, რადგან მშენებლობა კულტურული მემკვიდრეობის ძეგლის სტატუსის მქონე მიმდებარე ტერიტორიაზე, ძეგლის ვიზუალური დაცვის ზონაში უნდა მოხდეს.
მისცემს თუ არა ზონალური საბჭო ნავსადგურში ტერმინალის მშენებლობაზე დადებით რეკომენდაციას კომპანიას, ამის შესახებ მოგვიანებით გახდება ცნობილი. თუმცა ზონალური საბჭოს თავმჯდომარემ, ზაურ ახვლედიანმა სხდომაზე განაცხადა, რომ ტერმინალის პროექტის მოცემულ სიმაღლეებზე ის თანახმაა.
პროექტის რენდერი
„გეოგრაფიკის“ მიერ მომზადებული რუკის მიხედვით, იმ ტერიტორიის მიმდებარედ, სადაც ტერმინალის აგება იგეგმება, კულტურული მემკვიდრეობის ძეგლის სტატუსის მქონე სამი შენობაა: XX საუკუნის პირველ ნახევარში აგებული ორსართულიანი სახლი მაქაცარიას #1-ში და ამავე პერიოდში აგებული, ერთ და ორსართულიანი სახლები მაქაცარიას #3-ში.
კარბამიდის ტერმინალის აშენებას ბათუმში საზოგადოების ნაწილი აპროტესტებს. ბათუმის პორტში კარბამიდის გადასატვირთი ტერმინალი გარემოზე ზემოქმედების შეფასების [გზშ] გარეშე აშენდება.
