აჭარის მთავრობის აპარატის პროტოკოლის დეპარტამენტის უფროსი, ალექსანდრე დავითაძე, აჭარის განათლების მინისტრის მოადგილედ დანიშნეს. ამ დეპარტამენტში ვაკანტურია, ასევე, სპეციალისტის თანამდებობა.
დაახლოებით ორი თვის წინ თანამდებობა დატოვა აჭარის მთავრობის მედიასა და საზოგადოებასთან ურთიერთობის დეპარტამენტის უფროსმა სოფო გუჯაბიძემაც. ის ბათუმის ბულვარის დირექტორის მოადგილედ დაინიშნა – ამ ორი დეპარტამენტის ხელმძღვანელების თანამდებობების ჩათვლით მთავრობის აპარატში სულ შვიდი პოზიციაა ვაკანტური.
ვაკანტურია იურიდიული განყოფილების უფროსის, მონიტორინგის დეპარტამენტის მეორე კატეგორიის უფროსი სპეციალისტისა და საერთაშორისო ურთიერთობების დეპარტამენტის სპეციალისტის, ასევე, შესყიდვების განყოფილების უფროსის თანამდებობები.
ამ კონკრეტულ თანამდებობზე კონკრეტული პირების შესარჩევად, კანონმდებლობით დადგენილი წესით, მთავრობამ კონკურსი უნდა გამოაცხადოს. თუმცა, ჯერჯერობით, უცნობია, როდის გამოაცხადებს მთავრობა კონკურსს. უწყების პრესსამსახურში ვერც იმას გვიკონკრეტებენ, კიდევ რა საკადრო ცვლილებებია უახლოეს მომავალში მოსალოდნელი.
რეორგანიზაცია აჭარის სამთავრობო სტრუქტურებში მთავრობის თავმჯდომარემ თორნიკე რიჟვაძემ გუშინ დააანონსა. მისი პროტოკოლის უფროსის განათლების მინისტრის მოადგილედ დანიშვნის გარდა დღეს სოფლის მეურნეობის სამინისტროში გადაიყვანეს სულხან მოწყობილიც, ქობულეთის მერის ყოფილი მოადგილე.
