ქედაში „ევროპული საქართველო“ ხუთმა წევრმა დატოვა

ქედაში „ევროპული საქართველოს“ ხუთმა წევრმა: ნუგზარ ბერიძემ, სერგო მიქელაძემ, თენგიზ დიასამიძემ, სანიბეგ საფარიძემ და მარინე ცინცაძემ პარტია დატოვა. „ევროპული საქართველოს“ საარჩევნო შტაბის ყოფილი ხელმძღვანელის, ნუგზარ ბერიძის თქმით, მათ პარტია პროტესტის ნიშნად დატოვეს.

„წამოვედით იმ მოტივით, რომ არ ვთანამშრომლობთ „ნაციონალურ მოძრაობასთან“, არ ვიზიარებთ მათ პროგრამას და შეხედულებებს,“ – ამბობს ნუგზარ ბერიძე.

„ბათუმელების“ კითხვაზე, ხომ არ აპირებენ ყოფილი წევრები „ქართული ოცნების“ რიგებში გაერთიანებას, ნუგზარ ბერიძე ამბობს, რომ მმართველი პარტიის წევრობას არ გეგმავენ. თუმცა, შესაძლოა, ხმა საპრეზიდენტო კანდიდატს, სალომე ზურაბიშვილს მისცენ.

„შესაძლებელია მხარი დავუჭიროთ დამოუკიდებელ კანდიდატს. ეს არ ნიშნავს პარტიის წევრობას და აქტივისტობას, უბრალოდ, სხვა ალტერნატივა არ დაგვიტოვეს. „ქართული ოცნების“ წევრობა რომ გვდომებოდა, თავიდანვე შევიდოდით ამ პარტიაში და არა „ევროპულ საქართველოში“, მაგრამ ვარჩიეთ, რომ ცუდსა და უარესს შორის არ დავუჭიროთ მხარი გრიგოლ ვაშაძეს,“  – განაცხადა ნუგზარ ბერიძემ.

გასულ კვირას „ევროპული საქართველო“ ბათუმის ორგანიზაციის ხელმძღვანელმა და სხვა წევრებმაც დატოვეს.

აჭარაში “ევროპული საქართველოს” ოფისების ხელმძღვანელებმა პარტია დატოვეს

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com