“ჩვენთვის მიუღებელია „ნაციონალური მოძრაობის“ კანდიდატის, გრიგოლ ვაშაძის მხარდაჭერა. ჩვენ ვემიჯნებით რუსულ სცენარს, სააკაშვილისა და ვარშალომიძის მობრუნებას,” – ეს განცხადება დღეს ბათუმში, პარტია “ევროპული საქართველოს” ბათუმის ორგანიზაციის ხელმძღვანელმა რაულ თავართქილაძემ გააკეთა.
რაულ თავართქილაძე დღემდე, 19 ნოემბრამდე, “ევროპული საქართველოს” ბათუმის ორგანიზაციის ხელმძღვანელი იყო. თავართქილაძესთან ერთად პარტია დატოვეს ხულოს, ხელვაჩაურისა და ქობულეთის ოფისების ხელმძღვანელებმა.
„საპრეზიდენტო არჩევნებში ჩვენ მხარი დავუჭირეთ დავით ბაქრაძის კანდიდატურას და სწორედ „ევროპული საქართველოს“ აჭარის რეგიონული ორგანიზაციის დამსახურებით, პარტიამ აჭარაში 15 000-მდე ხმა მოიპოვა. ჩვენი მხრიდან დავით ბაქრაძის კანდიდატურის მხარდაჭერა განპირობებული იყო მისი დიპლომატიური გამოცდილებიდან გამომდინარე და გვჯეროდა, რომ ეს იყო ქვეყნის ევროპული არჩევანი. გვინდა, კიდევ ერთხელ გადავუხადოთ მადლობა ჩვენს ამომრჩევლებს და ამავდროულად გაცნობოთ იმ გადაწყვეტილების შესახებ, რაც ჩვენმა გუნდმა მიიღო,” – განაცხადა რაულ თავართქილაძემ.
