ბსუ-ს 100 სტუდენტი ჩინეთში გაემგზავრება, თუმცა ჯერ პროგრამა მზად არ არის

აჭარის მთავრობა ავრცელებს ინფორმაციას, რომ ბათუმის უნივერსიტეტის [ბსუ] 100 სტუდენტი, მათ შორის მაღალმთიანი აჭარიდან, ჩინეთის ერთ-ერთ წამყვან უნივერსიტეტში სხვადასხვა საგანმანათლებლო პროგრამაში ჩაერთვება. „ბათუმელების“ ინფორმაციით კი, ჯერ არც სტუდენტები შეურჩევიათ, არც გამგზავრებისა და სწავლების ვადებია დადგენილი და არც სხვა დეტალებია გარკვეული. არც ის არის ცნობილი, ვინ დააფინანსებს ამ სტუდენტების ჩინეთში ცხოვრების ხარჯებს.

მთავრობის ინფორმაციით, თანამშრომლობის მიზნით, ბათუმის უნივერსიტეტში მყოფ ჩინეთის დელეგაციის წევრებს აჭარის მთავრობის თავმჯდომარე თორნიკე რიჟვაძეც შეხვდა. მხარეებმა თანამშრომლობის ფარგლებში ერთობლივი სასწავლო-სამეცნიერო პროექტები და გაცვლითი პროგრამები განიხილეს.

მთავრობის განცხადებაში ნათქვამია, ასევე, რომ სტუდენტები ჩანგშას მეცნიერებისა და ტექნოლოგიების უნივერსიტეტში ისწავლიან. გაცვლითი პროგრამა საქართველო-ჩინეთის ასოციაციის იმ მემორანდუმის ფარგლებში განხორციელდება, რომელსაც  ბსუ-ს რექტორმა მერაბ ხალვაშმა, საქართველო-ჩინეთის მეგობრობის ასოციაციის დირექტორმა დავით ებრალიძემ და ჩანგშას მეცნიერებისა და ტექნოლოგიების უნივერსიტეტის პროფესორმა ფუ ჰანგუანიმ მოაწერეს ხელი.

მხარეთა შეთანხმებით, უნდა შემუშავდეს ერთობლივი საგანმანათლებლო სადოქტორო პროგრამები, ჩატარდება სამეცნიერო პროექტები, კონფერენციები, საზაფხულო სკოლები და სემინარები. მემორანდუმი, ასევე, ითვალისწინებს საგანმანათლებლო, სამეცნიერო, მეთოდოლოგიური ლიტერატურის გაცვლასა და სასწავლო, სამეცნიერო-კვლევითი აქტივობების მართვის გამოცდილების გაზიარებას.