საქართველოს განათლების მინისტრმა, მიხეილ ბატიაშვილმა, დღეს, 8 ნოემბერს, მთავრობის სხდომის შემდეგ კომენტარი გააკეთა მასწავლებლების ხელფასების გაზრდასთან დაკავშირებით.
„ნეტგაზეთის“ კითხვაზე, რამდენი ლარით გაიზრდება მასწავლებლის საბაზისო ხელფასი 2019 წელს და ნამდვილად იგეგმება თუ არა ზრდა, მინისტრი ამბობს, რომ ვის და რამდენი ლარით გაეზრდება ხელფასი, დეტალები ბიუჯეტის პროექტზე მუშაობის დასრულების შემდეგ იქნება ცნობილი.
„ამაზე კონკრეტულ ინფორმაციას მოგაწვდით წლის ბოლოს, როცა დასრულდება ბიუჯეტზე მუშაობა. იცით, რომ მიმდინარეობს ბიუჯეტების განხილვა, ჩვენც ვმუშაობთ ამაზე ინტენსიურად და ძალიან მალე წარმოვადგენთ კონკრეტულ გათვლებს და ციფრებს.
რაოდენობაზე, პოზიციებზე, ადმინისტრაციულ პერსონალსა და რესურსცენტრებზეც მოგაწვდით ინფორმაციას, თუ როგორ წარმოგვიდგენია ხელფასების მატება წლების მიხედვით“.
„ნეტგაზეთმა“ მინისტრს ასევე ჰკითხა, ხელფასების ზრდაში იგულისხმება საბაზისო ხელფასის მატება, თუ მასწავლებლის კარიერული სქემით გათვალისწინებული დანამატის ზრდა. „ჩვენ ამაზე ვმუშაობთ“, – თქვა მინისტრმა კითხვის პასუხად.
ბოლო დღეებია განათლების სამინისტრო აქტიურად აანონსებს მასწავლებლებისთვის ხელფასების მომატებას. შესაბამისად, განათლების მინისტრს აქედან გამომდინარე ვკითხეთ, როდის და რამდენით იგეგმება ხელფასების გაზრდა.
