„ახალგაზრდები ევროპული მომავლისთვის“ დამკვირვებელი მურმან ქარცივაძე ამბობს, რომ არჩევნების დასრულებამდე დაახლოებით ერთი საათით ადრე, ჯავახიშვილის ქუჩაზე არსებულ საარჩევნო უბანში მარკირებიანი პირები მივიდნენ და ხმის მიცემას ცდილობენ.
„ჯერ სამი პირი შემოვიდა და ვნახეთ, რომ მარკირება ჰქონდათ გაკეთებული. გავაბრუნეთ უკან, მივიდნენ „ქართული ოცნების“ კოორდინატორებთან და იქედან უკვე 5-6 ადამიანი მოვიდა ისევ, რომლებსაც ასევე ხელზე ემჩნეოდათ მარკირება.
ამბობდნენ, მანდარინი ვჭამეთ და იმის კვალიაო. ყველამ ერთად როგორ ჭამეთ მანდარინი, ბაღჩიდან მოდიხართ მეთქი – ვუთხარი“ – ამბობს მურმან ქარცივაძე.
საოლქო საარჩევნო კომისიის თავმჯდომარის ციალა შავაძე ამბობს, რომ #62-ე უბანზე ერთ ამომრჩეველს მართლაც აღენიშნებოდა ნათება ხელზე, მაგრამ ეს მისვე თქმით, „წამალი აღმოჩნდა და ხელის დაბანის შემდეგ მოქალაქემ ხმა მისცა“.
ციალა შავაძის თქმით, სხვა ამომრჩეველს მსგავსი ნიშნები არ ჰქონდა.
მურმან ქარცივაძის თქმით, მას საჩივარი არ დაუწერია.
