ნეტგაზეთი • RU

ქობულეთში უეფას მე-2 კატეგორიის სტადიონს ააშენებენ VIP შესასვლელითა და პარკინგით

ქობულეთში არსებული საფეხბურთო სტადიონის ადგილზე ახალი, 7-8 ათას მაყურებელზე გათვლილი უეფას მე-2 კატეგორიის საფეხბურთო სტადიონის მოწყობა იგეგმება.

სტადიონის დეტალური პროექტისა და ხარჯთაღრიცხვის მომზადებაზე შპს „აჭარის პროექტების მართვის კომპანია“ [ყოფილი შპს „სტადიონი“] კონკურსს გამოაცხადებს. მანამდე კი, კომპანია, სავარაუდო ღირებულების დადგენის მიზნით, ბაზარს იკვლევს.

ბაზრის კვლევის დოკუმენტების მიხედვით, უეფას მეორე კატეგორიის სტადიონზე ნებადართულია ჩატარდეს:

  • „საქართველოს ეროვნული ჩემპიონატისა და დავით ყიფიანის თასის მატჩები
  • ევროლიგის, კონფერენს ლიგის და ჩემპიონთა ლიგის პირველი და მეორე ეტაპის მატჩები
  • საქართველოს ეროვნული ნაკრების ამხანაგური თუ ყველა ახალგაზრდული ნაკრებების [17, 19 და 21 წლამდე ნაკრებების] ოფიციალური მატჩები

სტადიონი უნდა იყოს ერთიარუსიანი და აუცილებლად დახურული ოთხივე მხარეს.

მინდორი ოთხივე მხრიდან უნდა ნიავდებოდეს ბუნებრივი ვენტილაციით [გამჭოლი ჰაერით]. გადახურვამ ხელი არ უნდა შეუშალოს მზის სხივების წვდომას წელიწადის ნებისმიერ დროს ბუნებრივი საფარის მთელს არეალზე.“

სტადიონის დამპროექტებელმა ასევე უნდა გაითვალისწინოს შემდეგი მოთხოვნები:

  • „მინდვრის საფარი უნდა იყოს ჰიბრიდული ბუნებრივი საფარი [აღჭურვილი დრენაჟით და ავტომატური სარწყავი სისტემით].
  • სპორტული განათების სანათები უნდა იყოს აუცილებლად LED ტიპის. ელ.კვების გათიშვის შემთხვევაში უნდა ჩაირთოს სათადარიგო დენის წყარო (ან გენერატორი) 5-10 წამში და უნდა უზრუნველყოს 100% განათება.
  • სტადიონზე უნდა დაპროექტდეს: ფეხბურთელთა მოთელვის ადგილი; ორი გასახდელი; მსაჯის და დელეგატის ოთახი; სასწრაფო პირველადი დახმარების ოთახი ფეხბურთელებისა და ოფიციოზისთვის; ტელესტუდიები, საპრესკონფერენციო ოთახი და შერეული ზონა, დოპინგის ოთახი; გუნდების და ოფიციოზის პარკინგი და სხვა.
  • „მაყურებელთა სკამი უნდა იყოს გასაშლელი, უნდა იყოს ინდივიდუალური, მყარად დაფიქსირებული, ერთმანეთისგან გამოყოფილი და ანტივანდალური. საზურგის სიმაღლე უნდა იყოს სულ მცირე 30 სმ. (რაოდენობა დაზუსტდეს პროექტის შესაბამისად, მაგრამ არანაკლებ 7000-სა და არაუმეტეს 8000-სა).
  • ხის საერთო დასაჯდომი სკამები კატეგორიულად აკრძალულია.
  • ასევე გასათვალისწინებელია რაგბის კარები, რაგბის სათამაშო მოედნის ზომები 94X68, კარის სიმაღლე 15 მ.
  • სტადიონს უნდა ჰქონდეს ყველა სექტორში ყველა მაყურებლისთვის განკუთვნილი ცივი კვების ობიექტი არანაკლებ – 8.
  • სტადიონის საერთო ტევადობის არანაკლებ 5% უნდა იყოს განკუთვნილი სტუმართა გუნდის გულშემატკივრებისთვის და უნდა იყოს გამოყოფილი შემოღობვით. ასევე აღნიშნულ ტრიბუნაზე შესასვლელი უნდა იყოს ცალკე სხვებისგან დამოუკიდებელი. აღჭურვილი უნდა იყოს კვების ობიექტით და შესაბამისი რაოდენობის სან-კვანძებით.
  • პირველადი სასწრაფო სამედიცინო დახმარება მაყურებლისთვის ხელმისაწვდომი უნდა იყოს სტადიონის ყველა სექტორზე. პირველადი დახმარების ოთახი და ოთახამდე მისასვლელი მკაფიოდ უნდა იყოს მინიშნებული.
  • პროექტირებისას გათვალისწინებული უნდა იყოს საპროექტო ტერიტორიაზე ტრანსპორტის მოძრაობის სქემა (მათ შორის სახანძრო-სამაშველო და შშმ პირთათვის). გასათვალისწინებელია ევაკუაციის გეგმა და სახანძრო სისტემები“.

სტადიონზე „VIP ლოჟა უნდა იყოს გადახურული, უნდა მდებარეობდეს მთავარ ტრიბუნაზე (დასავლეთ ტრიბუნა) მინდვრის შუახაზის ამოყოლებაზე, საჯარიმოებს შორის, 100 ადამიანზე, ადაპტირებული შქმ მაყურებელზე. VIP ლოჟა უნდა იყოს, აღჭურვილი მოსასვენებელი
სივრცით, ბარით, სამზარეულოთი, ტელევიზორით, ინტერნეტით, უნდა მოეწყოს სამედიცინო პუნქტი, სან-კვანძები, უნდა ჰქონდეს დამოუკიდებელი შესასვლელი, დასასხდომი ადგილი უნდა იყოს შემოსაზღვრული მუდმივი ჯებირით.

VIP შესასვლელი უნდა იყოს ადაპტირებული VIP პარკინგთან.

რაც შეეხება მედიას – „მედიის წარმომადგენელთათვის უნდა მოეწყოს ერთი სამუშაო ოთახი, რომელიც უნდა იყოს აღჭურვილი მერხებით, ინდივიდუალური დენის წყაროთი და ტელეფონ/ინტერნეტით არანაკლებ 45 ადამიანზე.“

დასაპროექტებელი სტადიონის ჩრდილოეთ და დასავლეთ ტრიბუნების ქვეშ უნდა მოეწყოს კომერციული ფართობები, რომელთაც „პირდაპირი წვდომა უნდა ჰქონდეს საზოგადოებრივ სივრცესთან. ყველა კომერციული ფართობი უნდა იყოს ინდივიდუალური შესასვლელით და აღჭურვილი იყოს ყველა საჭირო ინდივიდუალური საინჟინრო სისტემებით.“

ქობულეთის საფეხბურთო სტადიონი დღეს:

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

ქობულეთის საფეხბურთო სტადიონი დღეს / 29.09.2023 / ფოტო: გურამ მურვანიძე/„ბათუმელები“

განახლება: „აჭარის პროექტების მართვის კომპანიამ“ ბაზრის კვლევა ამავე საკითხზე ხელახლა გამოაცხადა. დაინტერესებულ პირებს შეუძლიათ თავიანთი წინადადებები კომპანიას წერილობითი სახით მიაწოდონ, არაუგვიანეს 2023 წლის 20 ნოემბრისა. 

„ქობულეთის საფეხბურთო სტადიონის სარეაბილიტაციო სამუშაოების ჩატარების მიზნით, აჭარის პროექტების მართვის კომპანიის მიერ გამოცხადებულ ბაზრის კვლევაში მონაწილე სუბიექტების არასაკმარისი რაოდენობის გამო, ვერ მოხერხდა პროექტის შესყიდვის სავარაუდო ღირებულების დადგენა, კვლევის ბაზრის გაფართოებისა და მსურველთა რაოდენობის გაზრდის მიზნით, აჭარის პროექტების მართვის კომპანიამ ხელახლა გამოაცხადა ბაზრის კვლევა.“ – მოგვწერეს კომპანიიდან 9 ნოემბერს.

საჯარო რეესტრის მონაცემებით:

ქალაქ ქობულეთში, აღმაშენებლის გამზირის N49-ში მდებარე მიწის ნაკვეთი, სადაც სტადიონია განთავსებული, აჭარის ავტონომიური რესპუბლიკის საკუთრებაშია.

მიწის ნაკვეთის ფართობი 24 976 კვადრატული მეტრია, ხოლო მასზე მდებარე სტადიონის ფართობი – 2 127 კვადრატული მეტრი.

ქონება უზუფრუქტით გადაცემულია შპს „საფეხბურთო კლუბი შუქურაზე“. თავის მხრივ „საფეხბურთო კლუბი შუქურას“ 100% წილის მესაკუთრეა აჭარის ავტონომიური რესპუბლიკა.

წილის მმართველი კი, შპს „საფეხბურთო კლუბი ქობულეთის შუქურაა“, რომლის 17%-ს აიეტ კუკავა ფლობს, ხოლო დანარჩენ 83%-ს სააქციო საზოგადოება „ალიანს ჯგუფი ჰოლდინგი“. ამ ჰოლდინგის დირექტორი და მესაკუთრეც აიეტ კუკავაა.

[„საფეხბურთო კლუბი ქობულეთის შუქურას“ წილებს აიეტ კუკავა და „ჰოლდინგი“ ,2023 წლის დეკემბრიდან ფლობენ. მანამდე, კი „შუქურას“ წილებს ჯუმბერ გოგიტიძე, რევაზ ჩელებაძე, გიორგი გოგისვანიძე, გიორგი თბილელი შემდეგ თეკლა ნაცარიშვილი] ფლობდნენ.

ამავე თემაზე „ბათუმელების“ არქივიდან:

ჩელებაძე და სხვები – ვის გადასცემენ ქობულეთის „შუქურას“

მასალების სხვა გამოცემებში გადაბეჭდვის წესი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com