ძველ ბულვარში მიმდინარე ახალ მშენებლობასთან ბრიფინგი დღეს, 9 ოქტომბერს, გელა დეკანაძემ გამართა, „ერთიანი ნაციონალური მოძრაობის“ წევრმა. მას ეჭვი აქვს, რომ კომპანია „ბათუმი ამბასადორი“ ბულვარში იჯარით გადაცემულ ადგილზე ორსართულიანი კაფეს ნაცვლად 50-სართულიან კორპუსს აშენებს.
„სხვა კუთხით გაუგებარია, რატომ მუშაობს აქ ბაუერის მძიმე ტექნიკა, რატომ ჩადიან მიწის სიღრმეში 80 მეტრი. ორსართულიანი რკინის კონსტრუქციის კაფეს დადგმას, რაც საინფორმაციო დაფაზეა გამოკრული, ეს სამუშაოები არ სჭირდება. ჩვენი ინფორმაციით, კომპანია კორუფციულ გარიგებაში შევიდა მერიასთან და აქ მრავალსართულიანი კორპუსის აშენებას გეგმავს. ესაა კამუფლაჟი, რომ თითქოს მხოლოდ კაფეს აკეთებენ“, – აცხადებს გელა დეკანაძე.
„პროექტი არ შეცვლილა და მის შეცვლას არ ვაპირებთ,“ – გვითხრა „ბათუმი ამბასადორის“ იურისტმა, გოჩა კამკიამ. მისი თქმით, ბულვარში კომპანია მხოლოდ ორანჟერეას ტიპის ორსართულიან კაფეს აშენებს, რომლის მშენებლობაც მომავალი წლის იანვრამდე დასრულდება.
რატომ დასჭირდა მრავალსართულიანი სახლის ტექნიკა კომპანიას ორსართულიანი კაფეს საძირკვლის მოსამზადებლად? – გოჩა კამკიამ გვიპასუხა, რომ მძიმე ტექნიკა საძირკვლის გამყარებისთვის მუშაობს, რადგან ქანები გეოლოგიურად არამყარია.
შპს „ამბასადორი ბათუმი“ ბულვარში, ყოფილი პოლიკლინიკის ადგილზე, ბალნეოლოგიურ-გამაჯანსაღებელ ცენტრსაც აშენებს. პროექტის მიხედვით, ცენტრი ორსართულაინი უნდა იყოს. ამის შესახებ „ბათუმელები“ 2018 წლის 22 ივნისს წერდა. მაშინ კონკრეტული ბიზნესმენები ამბობდნენ, რომ „ამბასადორ ბათუმის“ სასარგებლოდ მათ ავიწროებდნენ.
შპს „ამბასადორ ბათუმი“ ბულვარში ფლობს 1203 კვ.მ. მიწის ფართობს, ასევე, ამ ქონების მიმდებარედ ბათუმის ბულვარის ადმინისტრაციასთან გაფორმებული საიჯარო შეთანხმებით – 224 კვ/მეტრი არასასოფლო-სამეურნეო მიწის ნაკვეთს. კომპანიას სარგებლობაში გადასცეს ასევე კიდევ ერთი, 117 კვ/მეტრი მიწის ნაკვეთი ბულვარში და მასზე დამაგრებული შენობა – 199 კვ/მეტრი. სწორედ ამ ადგილას იგეგმება ახალი კაფეს მშენებლობა.
კომპანია 2017 წლის სექტემბერში რუსეთის მოქალაქემ, ალექსანდრე ფრიდმა დააფუძნა. ის იყო კომპანიის ასივე პროცენტის მფლობელი და დირექტორი. უფრო ადრე, 2015 წელს მას საქართველოში კომპანია „ბბუ ჯორჯია“, 2016 წელს კი -„ ჩემი დრონები“ დაუფუძნებია. ის არის ასევე კომპანია „ჯორჯიან ვეი“-ს დამფუძნებელი და ორმოცდაათი პროცენტის მფლობელი, ალექსანდრე ფრიდი ფლობს ასევე შპს „სიგმა ქეპიტალ პარტნერს“.
2017 წლის სექტემბერშივე კომპანიის წილებში ცვლილება რამდენჯერმე შევიდა. ამ დროისთვის კომპანიის დამფუძნებელი წილებში საერთოდ აღარ ფიქსირდება და კომპანიას რუსეთის მოქალაქეები: ელგუჯა ქებურია და ვართან ვართანოვი იყოფენ. კომპანიის დირექტორად ელგუჯა ქებურიაა დაფიქსირებული.
ახალი კაფეს მაკეტი
